మరో ప్రాణాంతక జబ్బుతో చైనా గజగజ- ప్రపంచ ఆరోగ్య సంస్థ అలర్ట్

Pneumonia Outbreak In China : కొవిడ్ మహమ్మారి మిగిల్చిన విషాదం నుంచి ఇప్పుడిప్పుడే కోలుకుంటున్న చైనాను మరో ప్రాణంతక జబ్బు వణికిస్తోంది. పాఠశాలలకు వెళ్తున్న చిన్నారులు అంతుచిక్కని న్యుమోనియా లక్షణాల బారిన పడుతున్నారు. ఉత్తర చైనాలో వందలాది మంది చిన్నారులు ఊపిరితిత్తుల ఇన్‌ఫెక్షన్‌, శ్వాస సంబంధిత ఇబ్బందులు, జ్వరం వంటి లక్షణాలతో ఆస్పత్రుల్లో చేరుతుండడం ప్రపంచ దేశాలను కలవరపాటు గురిచేస్తోంది.

Pneumonia Outbreak In China :కరోనా మహమ్మారికి పుట్టినిల్లు అయిన చైనాలో మరో వ్యాధి అక్కడి ప్రజలను వణికిస్తోంది. చైనాలోని పాఠశాలల్లో అంతుచిక్కని న్యుమోనియా విజృంభిస్తోంది. చిన్నారులు అంతుచిక్కని వ్యాధి లక్షణాల బారిన పడుతున్నారు. ఇన్‌ఫెక్షన్‌, శ్వాస సంబంధిత సమస్యలు, జ్వరం వంటి లక్షణాలతో వందలాది మంది చిన్నారులు ఆస్పత్రుల్లో చేరుతున్నారని ప్రపంచవ్యాప్తంగా వ్యాధుల వ్యాప్తిని పరిశీలించే ప్రోమెడ్‌ అనే సంస్థ బయటపెట్టింది.

'ఆస్పత్రుల్లో చేరుతున్న వందల మంది చిన్నారులు'
బుధవారం నాడు అనారోగ్యానికి గురైన చిన్నారులతో బీజింగ్‌, లియనోనింగ్‌ ప్రాంతాల్లోని ఆస్పత్రులు నిండిపోయాయని ఆ సంస్థ పేర్కొంది. దగ్గు లేకపోయినా ఊపిరితిత్తుల ఇన్‌ఫెక్షన్‌, శ్వాస సంబంధిత ఇబ్బందులు, జ్వరం వంటి లక్షణాలతో చిన్నారులు ఆస్పత్రుల్లో చేరుతున్నారని తెలిపింది. ఒకేసారి వందల మంది పిల్లలు అనారోగ్యానికి గురికావడం అసాధారణ విషయమని.. ఈ జబ్బు ఎప్పుడు, ఎలా పుట్టుకొచ్చిందో స్పష్టత లేకపోయినా.. పాఠశాలలోనే వ్యాప్తి చెంది ఉండొచ్చని ప్రోమెడ్ సంస్థ పేర్కొంది. అలాగే పెద్దలు ఈ వ్యాధికి గురయ్యారా లేదా అన్న విషయాన్ని కూడా వెల్లడించలేదు. మరో మహమ్మారిగా ఇది మారుతుందా అన్నది ఇప్పుడే చెప్పలేమని వివరించింది.

అప్రమత్తమైన ప్రపంచ ఆరోగ్య సంస్థ ( WHO)
చైనాలోని చిన్నారుల్లో న్యుమోనియా కేసులు పెరుగుతుండడంపై ప్రపంచ ఆరోగ్య సంస్థ- WHO అప్రమత్తమైంది.దీనిపై పూర్తి వివరాలు తెలియజేయాలని.. చైనాను కోరింది. జబ్బు లక్షణాలు, అనారోగ్యానికి గురవుతున్న చిన్నారులు ఉండే ప్రాంతాల వివరాలు ఇవ్వాలని WHO పేర్కొంది.

చైనా అధికారులు ఇటీవలే తమ దేశంలో శ్వాసకోశ సమస్యల కేసులు ఎక్కువగా వస్తున్నాయని ప్రకటించారు. అయితే వార్తా కథనాల్లో పేర్కొన్నవి, ఇవీ ఒకటేనా కాదా అన్నదానిపై స్పష్టత లేదని డబ్ల్యూహెచ్‌ఓ వెల్లడించింది. అలాగే, ఈ జబ్బు వ్యాప్తి చెందకుండా చైనా ప్రజలు తగిన జాగ్రత్తలు తీసుకోవాలని సూచించింది. బహిరంగ ప్రదేశాల్లో మాస్కులు ధరించాలని సూచించింది. ఆరోగ్య వ్యవస్థను మరింత బలోపేతం చేయాలని అక్కడి అధికారులను WHO కోరింది.

శ్వాసకోశ వ్యాధుల్లో అసాధారణ పెరుగుదల గుర్తించలేదని చైనా తెలిపింది. సాధారణ పెరుగుదల మాత్రమే ఉందని వెల్లడించింది. చైనాలోని చిన్నారులు ఎదుర్కొంటున్న తొలి శీతాకాలం ఇదేనని, అందువల్ల శ్వాసకోశ సమస్యల కేసులు పెరిగి ఉండొచ్చని అక్కడి అధికారులు చెప్పారు. శ్వాసకోశ వ్యాధులు పెరగడం వల్ల ఆసుపత్రి సామర్థ్యాలకు మించి రోగుల భారం పడలేదని వారు పేర్కొన్నారు.