ఆస్ట్రేలియాలో హిందూ దేవాలయాలపై జరుగుతున్న దాడుల గురించి ఆ దేశ ప్రధాని ముందు ప్రస్తావించారు భారత ప్రధానమంత్రి నరేంద్ర మోదీ. ఇరుదేశాల మధ్య ఉన్న స్నేహపూర్వక సంబంధాలను దెబ్బతీసే చర్యలను సహించకూడదని స్పష్టం చేశారు. గతంలోనూ ఈ విషయంపై ఆసీస్ ప్రధానితో తాను చర్చించిన విషయాన్ని మోదీ గుర్తు చేశారు. అలాంటి ఘటనలకు పాల్పడేవారిపై చర్యలు తీసుకున్నందుకు ఆస్ట్రేలియా ప్రధాని ఆంటోనీ అల్బనీస్కు కృతజ్ఞతలు తెలిపారు. అల్బనీస్తో ద్వైపాక్షిక చర్చల అనంతరం మీడియాతో మాట్లాడుతూ ఈ వ్యాఖ్యలు చేశారు మోదీ.
"ఆస్ట్రేలియాలో ఆలయాలపై జరుగుతున్న దాడులపై ప్రధానమంత్రి అల్బనీస్, నేను గతంలోనూ చర్చలు జరిపాం. వేర్పాటువాద శక్తుల గురించి చర్చించాం. ఈరోజు కూడా ఆ అంశాలపై మేం సమాలోచనలు చేశాం. భారత్, ఆస్ట్రేలియా మధ్య ఉన్న సత్సంబంధాలను దెబ్బతీయడాన్ని సహించకూడదు. వేర్పాటువాద శక్తులపై ఆస్ట్రేలియా ప్రధాని కఠిన చర్యలు తీసుకున్నారు. ఇకపైనా గట్టి చర్యలు తీసుకుంటామని ప్రధాని అల్బనీస్ నాకు హామీ ఇచ్చారు."
-నరేంద్ర మోదీ, భారత ప్రధానమంత్రి
ఆస్ట్రేలియాతో సంబంధాలు టీ20 మోడ్లోకి ప్రవేశించాయని మోదీ చెప్పుకొచ్చారు. ఒక్క ఏడాదిలోనే.. ఆ దేశ ప్రధానితో తాను ఆరుసార్లు సమావేశమైనట్లు గుర్తు చేశారు. భారత్లో జరగనున్న వన్డే ప్రపంచకప్ను చూసేందుకు రావాలని అల్బనీస్ను మోదీ ఆహ్వానించారు. ఆ సమయంలో దేశంలో దీపావళి సంబరాలు సైతం చూసే అవకాశం ఉంటుందని పేర్కొన్నారు. ఆస్ట్రేలియాలో పెద్ద సంఖ్యలో భారతీయులు ఉన్నారని పేర్కొన్న మోదీ.. ఇరుదేశాల మధ్య వారు జీవ వారధిగా నిలుస్తున్నారని వ్యాఖ్యానించారు. ఈ సందర్భంగా అల్బనీస్ను తన స్నేహితుడిగా అభివర్ణించారు మోదీ.
"నా మిత్రుడు, ఆస్ట్రేలియా ప్రధాని అల్బనీస్.. రెండు నెలల క్రితమే భారత్లో పర్యటించారు. ఇప్పుడు నేను ఆస్ట్రేలియాకు వచ్చాను. ఏడాది కాలంలో మా మధ్య జరుగుతున్న ఆరో సమావేశం ఇది. ఇరుదేశాల మధ్య బలమైన, లోతైన సంబంధాలకు ఈ సమావేశాలు అద్దం పడుతున్నాయి. క్రికెట్ పరిభాషలో చెప్పాలంటే.. మన సంబంధాలు టీ20 మోడ్లోకి ప్రవేశించాయి."
-నరేంద్ర మోదీ, భారత ప్రధానమంత్రి
బెంగళూరులో ఆస్ట్రేలియా కాన్సులేట్ జనరల్ను ఏర్పాటు చేయనున్నట్లు ఆ దేశ ప్రధాని అల్బనీస్ ప్రకటించారు. భారత్లో కొత్తపుంతలు తొక్కుతున్న డిజిటల్ ఎకానమీని ఆస్ట్రేలియా వాణిజ్యంతో అనుసంధానం చేసేందుకు కాన్సులేట్ జనరల్ ఉపయోగపడుతుందని చెప్పారు. భారత్, ఆస్ట్రేలియా దేశాల ద్వైపాక్షిక వాణిజ్యాన్ని పెంపొందించే 'సమగ్ర ఆర్థిక సహకార ఒప్పందం' (సీఈసీఏ)పై వీలైనంత త్వరగా ఓ నిర్ణయానికి రావాలని ఇరుదేశాల ప్రధానులు ఉద్ఘాటించారు. తాజా చర్చల్లో రెండు ఒప్పందాలు ఖరారు అయినట్లు తెలిపారు. భారత్- ఆస్ట్రేలియా గ్రీన్ హైడ్రోజన్ టాస్క్ఫోర్స్ ఏర్పాటులో కీలక ముందడుగు పడిందని ఇరుదేశాధినేతలు పేర్కొన్నారు.
ఆస్ట్రేలియా ప్రతినిధులతో మోదీ చర్చలు
