భారత దేశంలోని బీపీ రోగులలో నాలుగింట ఒక వంతు కంటే తక్కువ మందిలో వారి రక్తపోటు అదుపులో ఉందని.. లాన్సెట్ జర్నల్ నివేదించింది. హృదయ సంబంధిత వ్యాధులతో పాటుగా రకరకాల అనారోగ్య సమస్యలకు అధిక రక్తపోటు ఓ ప్రధాన కారణమని తెలిపింది. నేషనల్ సెంటర్ ఫర్ డిసీజ్ కంట్రోల్, బోస్టన్ యూనివర్శిటీ పరిశోధకులు.. 2001-2020 నుంచి ప్రచురితమైన 51 అధ్యయనాలను పరిశీలించి ఓ నివేదికను తయారుచేశారు. ఈ అధ్యయనం ద్వారా గతంలో ఎన్నడూ లేని విధంగా బీపీ రోగుల్లో రక్తపోటు నియంత్రణ రేట్లలో మార్పులను కనుగొన్నట్లు లాన్సెట్ వెల్లడించింది. ఆ నివేదికలోని మరిన్ని ముఖ్యాంశాలు..
- 21 పరిశోధనా పత్రాల ఆధారంగా.. పురుషుల కంటే మహిళల్లో తక్కువ రక్తపోటు నియంత్రణ రేటు ఉన్నట్లు కనుగొన్నారు.
- 6 పరిశోధనా పత్రాలు గ్రామీణ ప్రాంతాల్లో ఉండే బీపీ రోగుల్లో వారి నియంత్రణ రేటు తక్కువగా ఉన్నట్లు వెల్లడించాయి.
- 2001-2020 మధ్య భారతదేశంలో రక్తపోటు నియంత్రణ రేటు 17.5 శాతంగా ఉంది.
- 2016-2020 మధ్య గణనీయంగా పెరిగి.. 22.5 శాతానికి చేరుకుందని పరిశోధకులు తెలిపారు.
- మరికొన్ని పరిశోధనా పత్రాలు ఉత్తర భారతదేశంతో పోల్చితే.. దక్షిణ, పశ్చిమ భారత్లో ఉండే బీపీ రోగులే ఎక్కువ రక్తపోటు నియంత్రణ రేట్లు కలిగి ఉన్నట్లు తెలిపారు. అయితే ఇక్కడ మహిళలతో పోల్చితే.. కొద్ది మంది పురుషుల్లోనే వారి రక్తపోటు అదుపులో ఉన్నట్లు గుర్తించారు.
- వీటిలో చాలా తక్కువ అధ్యయనాలు మాత్రమే బీపీ రోగుల జీవనశైలిని ప్రభావితం చేసే అంశాల గురించి నివేదించాయి.
- గతంతో పోల్చితే 2016-2020 మధ్య కాలంలో బీపీ నియంత్రణ రేటు పెరినప్పటికీ.. ప్రాంతాల వారీగా చాలా తేడాలు ఉన్నట్లు పరిశోధకులు తెలిపారు.
- ఈ అధ్యయనం ద్వారా సాధారణ మానవుడి రక్తపోటు 140/90తో పోల్చితే బీపీ రోగుల్లో రక్తపోటు చాలా అధికంగా ఉందని వెల్లడించారు.
- దేశం మొత్తం మీద 13 లక్షల మందికి పైగా ఈ అధ్యయనం జరిగింది. వీటిలో 15 రాష్ట్రాల నుంచే 39 అధ్యయనాలు ఉన్నాయి.
- మొత్తం అధ్యయనం చేసిన వారిలో 46.8 శాతం మందికి మాత్రమే వారి బీపీ గురించి అవగాహన ఉందని వెల్లడైంది.
భారత దేశంలో హై-బీపీ వల్ల అధికంగా మరణాలు నమోదువుతున్నట్లు పరిశోధకులు తెలిపారు. ఈ మరణాలను తగ్గించాలంటే ప్రజల్లో దీనిపై సరైన అహగావన ఉండాలని.. ప్రభుత్వాలే చొరవ తీసుకుని ప్రచార కార్యక్రమాలు నిర్వహించాల్సిన అవసరం ఉందని అభిప్రాయపడ్డారు. అవగాహన కల్పించడం ద్వారా హై-బీపీ వల్ల సంభవించే అనేక హృదయ సంబంధిత రోగాలను, మరణాలను తగ్గించవచ్చని చెప్పారు.