Jai Shankar Meets Rishi Sunak : బ్రిటన్ ప్రధానమంత్రి రిషి సునాక్తో భేటీ అయ్యారు భారత విదేశాంగ శాఖ మంత్రి జైశంకర్. అధికారిక పర్యటన కోసం యూకేకు వెళ్లిన ఆయన.. కుటుంబ సమేతంగా సునాక్ను కలిశారు. తన భార్య క్యోకోతో కలిసి ప్రధాని అధికారిక నివాసం 10 డౌనింగ్‌ స్ట్రీట్‌కు చేరుకున్న ఆయన.. రిషి సునాక్, అక్షత మూర్తి దంపతులకు ప్రధాని మోదీ తరఫున దీపావళి శుభాకాంక్షలు తెలిపారు. ఈ సందర్భంగా గణపతి విగ్రహంతో పాటు భారత స్టార్‌ క్రికెటర్‌ విరాట్‌ కోహ్లీ సంతకం చేసిన బ్యాట్‌ను రిషి సునాక్కు జైశంకర్ అందించారు. దీనికి సంబంధించిన ఫొటోలను యూకే ప్రధానమంత్రి కార్యాలయం ట్విట్టర్లో పోస్ట్‌ చేసింది. ఇద్దరూ కలిసి ప్రపంచవ్యాప్తంగా ఉన్న భారతీయులందరికీ దీపావళి శుభాకాంక్షలు చెప్పినట్లు పేర్కొంది.
మరోవైపు, తనకు ఆతిథ్యం ఇచ్చిన రిషి సునాక్ దంపతులకు ధన్యవాదాలు తెలుపుతూ జైశంకర్ కూడా ట్విట్టర్లో పోస్ట్‌ పెట్టారు. భారత్ అత్యంత వేగంగా అభివృద్ధి చెందుతున్న పెద్ద ఆర్థిక వ్యవస్థ అని విదేశాంగ మంత్రి పునరుద్ఘాటించారు. భారత్‌లో ఇప్పుడు సమర్థ నాయకత్వం ఉందని అన్నారు. నాలుగు రోజుల పర్యటనలో భాగంగా బ్రిటన్‌లో ఉన్న జైశంకర్... లండన్‌లోని శ్రీ స్వామినారాయణ మందిర్‌లో ప్రార్థనలు చేసి దీపావళి వేడుకల్లో పాల్గొన్నారు. సతీ సమేతంగా జైశంకర్ అభిషేక పూజలో పాల్గొన్నారు. సోమవారం లార్డ్స్ క్రికెట్ మైదానంలో భారత హైకమిషనర్ నిర్వహించే దీపావళి వేడుకలకు హాజరుకానున్నారు.