స్విస్ బ్యాంకుల్లో భారతీయ పౌరులు/సంస్థలకు చెందిన అకౌంట్ల వివరాలతో కూడిన నాలుగో జాబితా భారత్‌కు చేరింది. అందులో వ్యాపారస్థులతోపాటు కార్పొరేట్‌లు, ట్రస్టులకు చెందిన వందల అకౌంట్ల వివరాలు ఉన్నట్లు అధికారులు వెల్లడించారు. స్విట్జర్లాండ్‌తో కుదుర్చుకున్న సమాచార మార్పిడి ఒప్పందంలో భాగంగా బ్యాంకు అకౌంట్లకు సంబంధించి తాజా జాబితాను అందించింది.
అటోమేటిక్‌ ఇన్ఫర్మేషన్‌ ఎక్ఛేంజ్‌లో భాగంగా ప్రతిఏటా ఈ జాబితా స్విట్జర్లాండ్‌ అందిస్తుండగా.. తాజాగా 101 దేశాలకు చెందిన 34లక్షల అకౌంట్ల వివరాలను విడుదల చేసింది. ఈ జాబితాలో కొత్తగా నైజీరియా, పెరూ, టర్కీ, అల్బేనియా, బ్రూనీ వంటి దేశాలు చేరినట్లు ఫెడరల్‌ టాక్స్‌ అడ్మినిస్ట్రేషన్‌ వెల్లడించింది. దీంతో దాదాపు లక్ష అకౌంట్లు పెరిగినట్లు తెలిపింది. అయితే, 101 దేశాల పేర్లు, వాటి అకౌంట్ల వివరాలను బహిరంగంగా చెప్పనప్పటికీ ఆ జాబితాలో భారత్ ఉందని ఎఫ్‌టీఏ పేర్కొంది. ఆ వివరాలను ఈ ఏడాది సెప్టెంబర్‌లోనే భారత ప్రభుత్వానికి అందించినట్లు వెల్లడించింది.