జైలులో గ్యాంగ్​వార్​!.. 41 మంది మహిళా ఖైదీలు మృతి

Honduras Jail Fire : జైలులో జరిగిన ఘర్షణ కారణంగా 41 మంది మహిళా ఖైదీలు ప్రాణాలు కోల్పోయారు. మరో ఏడుగురు తీవ్రంగా గాయపడ్డారు. ఈ ఘటన ఎక్కడ జరిగిందంటే?

Honduras Jail Fire : సెంట్రల్​ అమెరికాలోని హోండురస్​లో దారుణం జరిగింది. దేశ రాజధాని తెగుసిగల్పాకు వాయవ్యంగా 30 మైళ్ల దూరంలో ఉన్న తమారా మహిళాజైలులో మంగళవారం ఖైదీల మధ్య జరిగిన గొడవల్లో 41 మంది ఖైదీలు మరణించారు. వీరిలో కొందరు సజీవ దహనం కాగా.. మరికొందరు తుపాకీ బుల్లెట్ గాయాలతో మరణించారు. మరో ఏడుగురు మహిళా ఖైదీలు తుపాకీ కాల్పులు, కత్తి గాయాలతో తెగుసిగల్పా ఆసుపత్రిలో చికిత్స పొందుతున్నారు.

జైలులో రెండు గ్యాంగ్​ల మధ్య గొడవే ఈ మరణాలకు కారణమని తెలుస్తోంది. జైళ్లలో అక్రమ కార్యకలాపాలను అరికట్టడానికి అధికారులు ఇటీవల చేసిన ప్రయత్నాల కారణంగానే అల్లర్లు జరిగాయని హోండురస్ జైళ్ల శాఖ అధికారి జూలిస్సా విల్లాన్యువా తెలిపారు. నిందితులపై కఠిన చర్యలు తీసుకుంటామని చెప్పారు.
జైలులో మహిళా ఖైదీల మరణించడంపై హోండురస్​ అధ్యక్షురాలు జియోమర క్యాస్ట్రో స్పందించారు. మహిళా ఖైదీల మరణాలు.. తనను తీవ్ర దిగ్భ్రాంతికి గురిచేశాయని ఆమె తెలిపారు. నిందుతులపై కఠిన చర్యలు తీసుకుంటామని క్యాస్ట్రో పేర్కొన్నారు.

ఖైదీల మధ్య జరిగిన ఘర్షణలో 18 మంది..
కొన్నాళ్ల క్రితం మధ్య అమెరికాలోని హోండురస్​ జైలులో ఖైదీల మధ్య జరిగిన తీవ్ర ఘర్షణలో 18 మంది చనిపోయారు. మరో ఇద్దరు గాయపడ్డారు. హోండురస్​ రాజధాని తెగుసిగల్పాలోని ఎల్​ పోర్వనిర్​ జైలులో జరిగిన ఈ ఘర్షణలో తుపాకులు, వేట కత్తులు వాడారని పోలీసులు తెలిపారు.

అంతకుముందు.. ఉత్తర టెలా ఓడరేవు పట్టణంలోని జైల్లో ఖైదీల మధ్య తీవ్ర ఘర్షణ జరిగింది. ఈ ఘటనలో 18 మంది చనిపోయారని జైలు అధికారులు తెలిపారు. మరో 16మంది గాయపడినట్లు వెల్లడించారు.

భద్రత పెంపునకు ఆదేశాలు..
ఈ ఘటనలతో అప్రమత్తమైన అప్పటి హోండురస్‌ అధ్యక్షుడు ఓర్లాండో హెర్నాండెజ్‌ దేశంలోని అన్ని జైళ్లలో భద్రత పెంపునకు ఆదేశించారు. దేశంలోని మొత్తం 27జైళ్లను పోలీసులు, ఆర్మీ.. తమ ఆధీనంలోకి తీసుకున్నాయి. ఈ పూర్తి వార్త కోసం ఇక్కడ క్లిక్ చెయ్యండి.

ఈక్వెడార్ జైలులో 68 మంది ఖైదీలు మృతి..
కొన్నాళ్ల క్రితం ఈక్వెడార్​ జైలులో ఖైదీల మధ్య ఘర్షణ జరిగింది. ఈ ఘటనలో దాదాపు 68 మంది ఖైదీలు మృతిచెందినట్లు అధికారులు వెల్లడించారు. మరో 25 మంది ఖైదీలు గాయపడ్డారు. ఘటనా స్థలంలో పేలుడు పదార్థాలు, తుపాకులు గుర్తించి వాటిని సీజ్ చేసినట్లు లిటోలర్ జైలు అధికారి పేర్కొన్నారు.

జైలు లోపల నుంచి చాలా సమయంపాటు పేలుళ్లు వినిపించాయని గాయాక్విల్​ నగరంలో లిటోలర్ జైలు సమీప ప్రాంతంలో నివసిస్తున్న ప్రజలు కొందరు తెలిపారు. అయితే.. ఈ ఘటనకు సంబంధించిన వీడియోలు కొన్ని సామాజిక మాధ్యమాల్లో వైరల్​ అయ్యాయి. ఈ పూర్తి వార్త కోసం ఇక్కడ క్లిక్ చెయ్యండి.

• ఇవీ చదవండి: