ఖలిస్థానీ మద్దతుదారుల విధ్వంసం.. మరో హిందూ దేవాలయంపై దాడి

ఆస్ట్రేలియాలోని మరో హిందూ ఆలయంపై ఖలిస్థానీ మద్దతుదారులు దాడి చేశారు. బ్రిస్బేన్​లోని శ్రీ లక్ష్మీ నారాయణ ఆలయాన్ని ధ్వంసం చేశారు. భారత్​కు వ్యతిరేకంగా నినాదాలు రాశారు.

ఖలిస్థానీ మద్దతుదారులు మరోసారి రెచ్చిపోయారు. ఆస్ట్రేలియా బ్రిస్బేన్‌లో ప్రఖ్యాత హిందూ ఆలయంపై దాడి చేశారు. శ్రీలక్ష్మీనారాయణ ఆలయ గోడలను ధ్వంసం చేశారు. భారత్​కు వ్యతిరేకంగా నినాదాలు రాశారు. 'సిక్కు ఫర్ జస్టిస్ (ఎస్​ఎఫ్​జే) అనే సంస్థ ఆలయంపై దాడి చేసినట్లు తెలుస్తోంది. ఆస్ట్రేలియాలో నివసిస్తున్న హిందువులను భయపెట్టడానికి ఈ సంస్థ చాలా ప్రయత్నిస్తోంది. వివిధ మార్గాల్లో హిందూ వ్యతిరేక ప్రచారం చేయడం ఈ సంస్థ ప్రధాన ఉద్దేశం.' అని ఆలయ ప్రెసిడెంట్ సతీందర్ శుక్లా తెలిపారు. దీనిపై పోలీసులకు ఫిర్యాదు చేశామని చెప్పారు.

ఒక్క జనవరిలోనే మూడు హిందూ దేవాలయాలపై దాడులు చేశారు ఖలిస్థానీ మద్దతుదారులు. జనవరి 23న మెల్​బోర్న్​లోని ఇస్కాన్​ ఆలయం గోడలపై వ్యతిరేక నినాదాలు చేశారు. జనవరి 16న ఆస్ట్రేలియాలోని క్యారమ్ డౌన్స్‌లోని శ్రీ శివవిష్ణు ఆలయాన్ని ధ్వంసం చేశారు. ఆలయ గోడలపై విద్వేషాలు రెచ్చగొట్టే నినాదాలు రాశారు. జనవరి 12న, ఆస్ట్రేలియాలోని మిల్ పార్క్‌లోని స్వామినారాయణ్​ఆలయాన్ని ధ్వంసం చేశారు. భారత్​, హిందూ వ్యతిరేక నినాదాలు గోడలపై రాశారు.

ఆస్ట్రేలియాలోని తమ కాన్సులేట్ జనరల్ స్థానిక పోలీసులతో మాట్లాడి సమాచారం తీసుకున్నారని విదేశాంగ ప్రతినిధి అరిందమ్ బాగ్చి తెలిపారు. ఈ ఘటనకు పాల్పడిన బాధ్యులపై వెంటనే చర్యలు తీసుకోవాలని, భవిష్యత్తులో ఇలాంటి ఘటనలు జరగకుండా చర్యలు తీసుకోవాలని కోరారు.

కెనడాలోని దేవాలయంపైనా..
అంతకుముందు కెనడా టొరంటోలోని స్వామినారాయణ్​ దేవాలయాన్ని ఖలిస్థానీ తీవ్రవాదులు అపవిత్రం చేశారు. ఆలయం గోడలపై భారత వ్యతిరేక నినాదాలు రాశారు. విద్వేషాన్ని వ్యాప్తి చేయడంలో భాగంగా ఈ దుశ్చర్యకు పాల్పడినట్లు తెలుస్తోంది. ఈ ఘటనను భారత హైకమిషన్​ తీవ్రంగా ఖండించింది. "బీఏపీఎస్​ స్వామినారాయణ్ మందిరంపై కెనడియన్​ ఖలిస్థానీ తీవ్రవాదుల చర్యను తీవ్రంగా ఖండిస్తున్నాం. ఈ విషయంపై తక్షణమే చర్యలు తీసుకోవాలని కెనడియన్​ అధికారులకు నివేదించాం" అని హైకమిషన్​ ట్విట్టర్​ ద్వారా తెలిపింది. ఈ చర్యను భారత హైకమిషన్​ తీవ్రంగా ఖండిస్తూ, దోషులపై సత్వర చర్యలు తీసుకోవాలని డిమాండ్ చేసింది.

పాకిస్థాన్​లోని ఆలయంపైనా దాడి
పాకిస్థాన్​లో ఓ హిందూ దేవాలయం దుండగుల దాడికి గురైంది. కరాచీ కోరంగి ప్రాంతంలోని శ్రీ మరీ మాతా మందిర్​పై గుర్తుతెలియని వ్యక్తులు దాడి చేశారు. ఆలయంలోని విగ్రహాలను ధ్వంసం చేసి పరారయ్యారు. ఆరు లేదా ఎనిమిది మంది దుండగులు ద్విచక్రవాహనాలపైన వచ్చి ఈ దుశ్చర్యకు పాల్పడ్డారని స్థానికులు వెల్లడించారు.

ఇవీ చదవండి: