Epstein List New Details :అమెరికాను కుదిపేసిన హైప్రొఫైల్ సెక్స్ కుంభకోణం మరోసారి తెరపైకి వచ్చింది. దిగ్గజ ఫైనాన్షియర్ జెఫ్రీ ఎప్స్టీన్ దుర్మార్గాల చిట్టాకు సంబంధించి మరికొన్ని రహస్య పత్రాలను న్యూయార్క్‌ కోర్టు బయటపెట్టింది. తాజాగా విడుదల చేసిన పత్రాల్లో చాలా వరకు ఎప్స్టీన్ కేసుకు సంబంధించిన న్యూస్‌పేపర్‌ కథనాలు, టీవీ డాక్యుమెంటరీలు, ఇంటర్వ్యూలు, బాధితుల వాంగ్మూలాలు ఉన్నాయి. అమెరికా మాజీ అధ్యక్షుడు బిల్‌ క్లింటన్‌తో ఎప్స్టీన్ సాన్నిహిత్యం, బ్రిటన్ రాజకుటుంబానికి చెందిన ప్రిన్స్ ఆండ్రూపై వచ్చిన ఆరోపణల వంటి వివరాలు వీటిలో ఉన్నాయి. ఈ డాక్యుమెంట్లలో పాప్‌ ఐకాన్‌ మైఖెల్‌ జాక్సన్‌, మాజీ అధ్యక్షుడు డొనాల్డ్ ట్రంప్ సహా 100 మందికిపైగా పేర్లు ఉండటం గమనార్హం.
ఎప్‌స్టీన్‌పై ఆరోపణలు చేసిన జొహన్నా సోబెర్గ్‌ ఇచ్చిన వాంగ్మూలంలో మైఖెల్‌ జాక్సన్‌ ప్రస్తావన ఉంది. ఎప్‌స్టీన్‌కు చెందిన ఫ్లోరిడాలోని పామ్‌ బీచ్‌ నివాసంలో తాను ఓ సారి ఆయన్ను కలిసినట్లు ఆమె పేర్కొన్నారు. అయితే, అప్పుడు ఆ పాప్‌స్టార్‌ తనను ఎలాంటి ఇబ్బందులకు గురిచేయలేదని తెలిపారు. మరో వాంగ్మూలంలో ప్రిన్స్ ఆండ్రూపై సోబెర్గ్‌ సంచలన ఆరోపణలు చేశారు. 2001లో తాను న్యూయార్క్‌ వెళ్లినప్పుడు ఎప్స్టీన్ నివాసంలో ఓ గ్రూప్ ఫొటో దిగామని తెలిపారు. అప్పుడు ప్రిన్స్ తనను అసభ్యంగా తాకినట్లు పేర్కొన్నారు.
'ట్రంప్ క్యాసినోలో గడిపాం!'
ఇదే వాంగ్మూలంలో బిల్‌ క్లింటన్‌, ట్రంప్ పేర్లను కూడా ఆమె ప్రస్తావించారు. న్యూయార్క్‌కు వెళ్తున్నప్పుడు వాతావరణ పరిస్థితులు అనుకూలించకపోవడం వల్ల ఎప్స్టీన్ తన ప్రైవేట్‌ జెట్‌ను న్యూజెర్సీలోని అట్లాంటిక్‌ సిటీకి మళ్లించాడని, అక్కడ తాము కొన్ని గంటల పాటు ట్రంప్ క్యాసినోలో ఉన్నట్లు సోబెర్గ్‌ తెలిపారు. అయితే, తాను ట్రంప్‌ను కలవలేదని, బిల్‌ క్లింటన్‌ను కూడా తానెప్పుడూ ప్రత్యక్షంగా కలవలేదని తెలిపారు. ఆయనకు బాలికలు, యువతులంటే ఇష్టమని ఎప్స్టీన్ ఓసారి తనతో అన్నాడని సోబెర్గ్‌ వాంగ్మూలం ఇచ్చినట్లు ఆ పత్రాల్లో ఉంది.