Biden Impeachment 2023 :అమెరికా ప్రతినిధుల సభ స్పీకర్ కెవిన్ మెక్కార్తి.. రిపబ్లికన్ పార్టీ ఒత్తిడికి తలొగ్గారు. అమెరికా అధ్యక్షుడు జో బైడెన్పై అభిశంసన విచారణకు అనుమతించారు. అధికారిక అభిశంసన విచారణ ప్రారంభించాలని హౌస్‌ కమిటీని ఆదేశిస్తున్నట్లు ప్రకటించారు. డెమొక్రటిక్‌ పార్టీ తరఫున అధ్యక్షుడిగా ఎన్నికైన బైడెన్.. తన కుమారుడు హంటర్‌ విదేశీ వ్యాపార లావీదేవీలను దాచిపెట్టారని ఈ సందర్భంగా మెక్కార్తిఆరోపించారు.
డెమొక్రాట్ పార్టీపై శ్వేతసౌధం ఫైర్..
Mccarthy Biden :అమెరికా అధ్యక్షుడు జో బైడెన్పై అభిశంసన విచారణకు అనుమతించడంపై శ్వేతసౌధం మండిపడింది. ప్రతిపక్ష రిపబ్లికన్ పార్టీ అత్యంత దారుణమైన రాజకీయాలు చేస్తోందని.. విమర్శించింది. హౌస్‌ ఆఫ్‌ రిపబ్లికన్లు 9నెలల నుంచి అధ్యక్షుడిని విచారిస్తున్నారని, అయినా తప్పు జరిగినట్లు ఆధారాలు చూపలేకపోయారని శ్వేతసౌధం ప్రతినిధి ఇయన్‌ సామ్స్‌ ట్వీట్ చేశారు.
అభిశంసనకు రిపబ్లికన్లు డిమాండ్..
Donald Trump Impeachment :డెమొక్రాట్ పార్టీకి చెందిన బైడెన్‌కుమారుడు హంటర్‌ ఉక్రెయిన్‌కు చెందిన ఇంధన కంపెనీలో డైరెక్టర్‌గా పనిచేశారు. ఆ సంస్థ నుంచి బైడెన్‌లకు ముడుపులు ముట్టాయని రిపబ్లికన్లు ఆరోపిస్తున్నారు. అమెరికా కాంగ్రెస్‌ దిగువ సభలో రిపబ్లికన్లకు ఉన్న మెజారిటీ అవకాశంగా తీసుకుని బైడెన్‌ను అభిశంసించాలని ట్రంప్ డిమాండ్ చేస్తున్నారు. గతంలో ట్రంప్‌అధ్యక్షుడిగా ఉన్నప్పుడు డెమొక్రాట్లు రెండుసార్లు అభిశంసన తీర్మానాలు ప్రవేశపెట్టారు. అందుకు ప్రతీకారంగా బైడెన్‌ను అభిశంసించాలని ట్రంప్ పట్టుబడుతున్నారు. అమెరికా చరిత్రలో మాజీ అధ్యక్షుడు డొనాల్డ్ ట్రంప్ మాత్రమే రెండుసార్లు అభిశంసన తీర్మానానికి ఎదుర్కొన్నారు. రెండు సార్లు.. డొనాల్డ్ ట్రంప్ అభిశంసన నుంచి గట్టెక్కారు.