ఉత్తరాఖండ్ జల ప్రళయం మిగిల్చిన తీవ్ర విషాదంపై పలువులు ప్రపంచస్థాయి నాయకులు దిగ్భ్రాంతి వ్యక్తం చేశారు. ఈ విషయమై భారత్కు ఎటువంటి సాయం కావాలన్నా అందించేందుకు తాము సిద్ధంగా ఉన్నామని తెలిపారు. వరద బీభత్సంలో ప్రాణాలు కోల్పోయిన వారి కుటుంబాలకు ప్రగాఢ సానుభూతి తెలియజేశారు.
ఎవరేమన్నారు..?
భారత్కు ఎటువంటి సాయం కావాలన్నా అందించేందుకు బ్రిటన్ సిద్ధంగా ఉంది. బాధిత కుటుంబాలకు, సహాయ సిబ్బందికి నా సంఘీభావం తెలియజేస్తున్నా.
-బోరిస్ జాన్సన్, బ్రిటన్ ప్రధాని
ఉత్తరాఖండ్లో సంభవించిన వరదతో చాలా మంది ప్రాణాలు కోల్పోయిన వార్త పాకిస్థాన్ ప్రజలను కలిచివేసిందని ఆ దేశ విదేశాంగ మంత్రిత్వ శాఖ ప్రతినిధి జాహిద్ హఫీజ్ అన్నారు.
ఉత్తరాఖండ్లో జరిగిన జల ప్రళయంలో ఎంతో మంది ఆచూకీ గల్లంతైంది. విలువైన ప్రాణాలు కోల్పోయినందుకు చాలా బాధగా ఉంది. బాధిత కుటుంబాలకు ప్రగాఢ సానుభూతి తెలియచేస్తున్నాను. తప్పిపోయిన వారు జాగ్రత్తగా బయటపడాలని కోరుకుంటున్నా.
-జాహిద్ హఫీజ్, పాకిస్థాన్ అధికార ప్రతినిధి
ధౌలీగంగా ఉప్పొంగిన కారణంగా మరణించిన వారి కుటుంబాలకు ప్రగాఢ సానుభూతి తెలియజేసింది అమెరికా విదేశాంగ శాఖ. ఈ ఘటనలో గాయాలపాలైన వారు త్వరగా కోలుకోవాలని ఆశిస్తున్నట్లు ట్వీట్ చేశారు. ఉత్తరాఖండ్ వరదల్లో ప్రాణాలు కోల్పోయినవారికి సంతాపం తెలిపారు ఫ్రాన్స్ అధ్యక్షుడు ఇమ్మానుయేల్ మేక్రాన్.
ఉత్తరాఖండ్ వరదలపై విచారం వ్యక్తం చేశారు భూటాన్ ప్రధాని లొటాయ్ షేరింగ్. "వరదల్లో మరణించినవారి ఆత్మలకు శాంతి కలగాలని ప్రార్థిస్తున్నా. గల్లంతైనవారు సురక్షితంగా బయటపడాలని ఆశిస్తున్నా. మిత్ర దేశం భారత్కు అండగా ఉంటాం" అని అన్నారు.
ఉత్తరాఖండ్లో భారీ వరద కారణంగా ఎంతో మంది మరణించారు అనే వార్త కలచి వేసిందని నేపాల్ విదేశాంగ శాఖ పేర్కొంది.
ఇదీ చూడండి:170 కాదు.. 203 మంది గల్లంతు:సీఎం రావత్
