2020.. ఎంతో ఆనందోత్సాహాలతో ప్రారంభమైంది.. కోట్లాదిమంది తమ భవిష్య ప్రణాళికలు రచించుకున్నారు... ఎన్నో ఆశలు.. అన్నీ కరోనా మహమ్మారి దెబ్బకు తలకిందులయ్యాయి. బతికుంటే చాలు అన్న విధంగా జీవితం మారింది. ఈ ఏడాది ఇలా మారడంపై అనేక మంది ఆవేదన చెందుతున్నారు. అయితే కొన్ని శతాబ్దాలకు ముందు ఒక ఏడాదిలో ప్రజలు పడిన కష్టాల్ని తలచుకుంటే ఇప్పుడు మన ముందు ఉన్నది చాలా చిన్న కష్టమే అని తెలుస్తుంది. అష్టకష్టాల ఏడాది క్రీ.శ. 536 ...
సూర్యుడు మాయమయ్యాడు..
ఆ ఏడాది ఐస్‌లాండ్‌లోని అగ్ని పర్వతం బద్దలయింది. మొత్తం ఐరోపాను ఇక్కడ నుంచి వెలువడిన బూడిద కప్పివేసింది. అనేక నెలల పాటు అగ్ని పర్వతం నుంచి పొగలు వస్తుండటంతో సూర్యకిరణాలు నేలపైకి ప్రసరించలేకపోయాయి. దీంతో వాతావరణ వైవిధ్యం తీవ్రంగా నష్టపోయింది. ఇప్పుడున్న సాంకేతిక పరిజ్ఞానం అప్పటి ప్రజలకు తెలియలేకపోవడం వల్ల ఏం జరిగిందో అర్థం కాలేదు. ఆ ఏడాది అంతా సూర్యుడు చంద్రుడిలాగా కనిపించాడు. ఉష్ణోగ్రతలు 1.5 సెల్సియస్‌ డిగ్రీల నుంచి 2.5 సెల్సియస్‌డిగ్రీలకు పడిపోయాయి. సుదూరంగా చైనాలో కూడా పంటలు నశించిపోయాయంటే అగ్నిపర్వత పేలుడు ఎంత తీవ్రంగా ఉందో ఊహించవచ్చు.
18 నెలలు.. పిట్టల్లా రాలిపోయారు..
దాదాపు 18 నెలలు సూర్యకాంతి ఐరోపా, ఆసియాలోని పలుదేశాలకు చేరలేదు. దీంతో పంటలు పండటం కష్టం కావడంతో ఆహార లభ్యత తక్కువగా ఉండేది. వేలమంది మనుషులు ఆకలితో ప్రాణాలు కోల్పోయారు. లక్షల సంఖ్యలో జంతువులు చనిపోయాయి.