'ముగ్గురిలో ఓ మహిళ హింసకు బాధితురాలే'

ప్రపంచవ్యాప్తంగా ముగ్గురిలో ఓ మహిళ తమ జీవితంలో హింసను ఎదుర్కొంటున్నారని డబ్ల్యూహెచ్ఓ నివేదిక తెలిపింది. మహిళలపై సొంత భాగస్వాములు చేసిన దాడులే అధికంగా ఉన్నాయని పేర్కొంది. 64.1 కోట్ల మంది మహిళలు సన్నిహితుల నుంచే హింసను ఎదుర్కొన్నారని తెలిపింది.

మహిళలపై జరుగుతున్న నేరాలపై ప్రపంచ ఆరోగ్య సంస్థ(డబ్ల్యూహెచ్ఓ) నిర్వహించిన అధ్యయనంలో విస్తుపోయే విషయాలు వెలుగులోకి వచ్చాయి. ప్రపంచవ్యాప్తంగా ముగ్గురిలో ఒక మహిళ తమ జీవిత కాలంలో భౌతిక లేదా లైంగిక హింసను ఎదుర్కొంటున్నారని తేలింది.

యువతులుగా ఉన్నప్పుడే చాలా మంది మహిళలు హింస బారిన పడుతున్నారని డబ్ల్యూహెచ్​ఓ నివేదిక తెలిపింది. రిలేషన్​షిప్​లో ఉన్న మహిళలు 20 ఏళ్ల లోపే తమ భాగస్వామి నుంచి హింసను ఎదుర్కొన్నారని తెలిపింది. మహిళా సన్నిహితులు, అపరిచితుల నుంచి ఎదురైన హింసాత్మక ఘటనలను పరిగణనలోకి తీసుకొని నివేదిక రూపొందించింది. 15 ఏళ్లు పైబడిన యువతులు, మహిళల్లో 73.6 కోట్ల మంది హింస బారిన పడ్డారని నివేదిక స్పష్టం చేసింది. ప్రపంచ వ్యాప్తంగా కనీసం ముగ్గురిలో ఒకరు భాగస్వామి లేదా అపరిచితుల నుంచి హింసను ఎదుర్కొన్నారని తెలిపింది.

"ప్రతి దేశం, ప్రతి సంస్కృతిలో మహిళల పట్ల హింస అంతంకాని మహమ్మారిలా మారిపోయింది. లక్షలాది మహిళలు, వారి కుటుంబాలకు ఇది హాని కలిగిస్తోంది. ఇది కొవిడ్ కారణంగా ఇంకా పెరిగిపోయింది. ఈ సమస్య పరిష్కరించడంలో ప్రభుత్వాలు సహకారం అందించాలి."

-టెడ్రోస్ అధనోమ్, డబ్ల్యూహెచ్ఓ చీఫ్

మహిళలపై సొంత భాగస్వాములు చేసిన దాడులే అధికంగా ఉన్నాయని పేర్కొంది. 64.1 కోట్ల మంది మహిళలు సన్నిహితుల నుంచే హింసను ఎదుర్కొన్నారని తెలిపింది. అధ్యయనంలో పాల్గొన్న 6 శాతం మంది మహిళలు.. భాగస్వాములు చేసిన దాడులను ఇతరుల దాడులుగా పేర్కొన్నారని వెల్లడించింది. వాటిని పరిగణలోకి తీసుకుంటే వాస్తవ సంఖ్య పెరుగుతుందని పేర్కొంది. అల్ప, మధ్యాదాయ దేశాల మహిళలపై ఈ హింస అసమాన ప్రభావం చూపుతోందని నివేదిక పేర్కొంది.

2013 తర్వాత తొలిసారి ఇలాంటి అధ్యయనం చేపట్టింది డబ్ల్యూహెచ్ఓ. మహిళలపై హింస విషయంలో జరిగిన అతిపెద్ద అధ్యయనం ఇదేనని డబ్ల్యూహెచ్ఓ పేర్కొంది. 2010-18 మధ్య డేటాను సేకరించి ఈ నివేదికను రూపొందించింది. కొవిడ్ ప్రభావం, ఆ తర్వాతి పరిస్థితులు ఇందులో లేకపోవడం గమనార్హం.

ఇదీ చదవండి:కరోనా వేళ దేశంలో పెరిగిన గృహహింస