వైద్యులు, సామాన్యులకు డబ్ల్యూహెచ్​ఓ 'యాప్​' సాయం

కొవిడ్​-19 సమాచారం తెలుసుకోవడం కోసం రెండు మొబైల్​ యాప్​లను ప్రారంభించింది ప్రపంచ ఆరోగ్య సంస్థ(డబ్ల్యూహెచ్​ఓ). వైరస్​ను ఎదుర్కోడానికి వైద్యులకు కావాల్సిన శిక్షణ కోసం 'డబ్ల్యూహెచ్​ఓ అకాడమీ'... సామాన్యులకు వ్యాధిపై తాజా సమాచారం ఇచ్చేందుకు 'డబ్ల్యూహెచ్​ఓ ఇన్ఫో' పేరుతో యాప్​లను రూపొందించింది. వీటిని యాపిల్​, గూగుల్​ ప్లే స్టోర్​లలో ఉచితంగా అందుబాటులో ఉంచారు.

కరోనాను ఎదుర్కొనే ప్రయత్నాల్లో భాగంగా సాంకేతికత సాయం తీసుకుంటోంది ప్రపంచ ఆరోగ్య సంస్థ(డబ్ల్యూహెచ్ఓ). మహమ్మారి గురించి వైద్యులు, ప్రజలకు సమాచారం అందిచేందుకు రెండు ప్రత్యేకమైన మొబైల్ యాప్​లను రూపొందించింది. వైద్య సిబ్బంది కోసం 'డబ్ల్యూహెచ్ఓ అకాడమీ', సామాన్యుల కోసం 'డబ్ల్యూహెచ్ఓ ఇన్ఫో' పేరుతో వాటిని ప్రవేశపెట్టింది.

డబ్ల్యూహెచ్ఓ అకాడమీ...

కొవిడ్​-19 నుంచి రోగులను, తమను కాపాడుకునేందుకు కావాల్సిన నైపుణ్యాలు, శిక్షణ అందించేందుకు వైద్య సిబ్బందికి సాయపడునుందీ 'డబ్ల్యూహెచ్ఓ అకాడమీ' యాప్. ప్రతి నిమిషం వారికి మార్గనిర్దేశం చేస్తుంది. డబ్ల్యూహెచ్ఓ మహమ్మారిపై చేసిన పరిశోధనా సమాచారాన్ని.. ఈ యాప్​ ద్వారా అందుబాటులో ఉంచనుంది. దీన్ని యాక్సెస్​ చేయడానికి సామాన్యులకు అవకాశం ఉండదు.

"కరోనా వైరస్​కు ఎదుర్కొవడానికి కావాల్సిన సమాచారం.. ప్రపంచంలో అన్ని మూలల ఉన్న వైద్యుల చేతుల్లో ఉంచేందుకు ఈ యాప్ తోడ్పడుతుంది."

-టెడ్రోస్​ అధనోమ్, డబ్ల్యూహెచ్ఓ డైరెక్టర్​ జనరల్​

సర్వే ఆధారంగా

ప్రపంచ వ్యాప్తంగా 20వేల మంది వైద్య సిబ్బంది నుంచి సేకరించిన వివరాలు, సర్వే ఆధారంగా ఈ యాప్​ను తయారు చేశారు. వారిలో ఎక్కువ మంది మహమ్మారి నుంచి ప్రజలను, తమని తాము కాపాడుకొనే పద్ధతులు తెలుసుకునేందుకు.. వర్చువల్​ లెర్నింగ్​ను ఏర్పాటు చేయాలని సూచించారట.

డబ్ల్యూహెచ్​ఓ ఇన్ఫో...

ప్రపంచంలోని పలు ప్రాంతాల్లో వైరస్ కేసులు, మహమ్మారిపై జరుగుతున్న పరిశోధనలు, వ్యాక్సిన్​ తయారీ వంటి వార్తలపై కచ్చితమైన సమాచారాన్ని ప్రజలకు అందిచనుందీ ఇన్ఫో యాప్​. యాపిల్​, గూగుల్​ ప్లే స్టోర్​లలో వీటిని ఉచితంగా అందుబాటులో ఉంచినట్లు తెలిపింది డబ్ల్యూహెచ్​ఓ.

ఇదీ చూడండి:పిల్లుల్లోనూ కరోనా వ్యాప్తి.. వాటి నుంచి మనుషులకు?