కరోనా టీకాను వృద్ధుల కంటే ముందు యువతకు ఇవ్వడాన్ని ప్రపంచ ఆరోగ్య సంస్థ తప్పుబట్టింది. ధనిక దేశాల్లో ఆరోగ్యంగా ఉన్న యువతకు సైతం టీకాలు అందుతున్నాయని పేర్కొంది. ఇది సరైనది కాదని వ్యాఖ్యానించింది. అదే సమయంలో పేద దేశాలకు కరోనా టీకాలు అందడం లేదని ఆవేదన వ్యక్తం చేసింది.
వారం పాటు కొనసాగే డబ్ల్యూహెచ్ఓ ఎగ్జిక్యూటివ్ బోర్డ్ సమావేశాన్ని ప్రారంభించిన సంస్థ డైరెక్టర్ జనరల్ టెడ్రోస్ అధనోమ్.. ఓ పేద దేశానికి ఇప్పటికి 25 డోసులు మాత్రమే లభించాయని చెప్పారు. టీకా అందుబాటులోకి రావడం పట్ల సంతోషం వ్యక్తం చేసిన ఆయన.. డోసుల పంపిణీలో అసమానతలపై ఆవేదన చెందారు.
"అత్యంత తక్కువ ఆదాయం కలిగిన ఓ దేశానికి(పేరు ప్రస్తావించలేదు) ఇప్పటివరకు 25 డోసులు మాత్రమే అందాయి. 25 లక్షలు కాదు, 25 వేలు కాదు.. కేవలం 25. అదే సమయంలో 50 ధనిక దేశాలు తమ ప్రజలకు 3.9 కోట్లకు పైగా డోసులు అందించాయి."