6 కోట్ల వ్యాక్సిన్ డోసుల కోసం యూకే ఒప్పందం

ప్రయోగాత్మక దశలో ఉన్న వ్యాక్సిన్​లను సొంతం చేసుకునేందుకు యూకే ప్రభుత్వం ముందస్తు ఒప్పందాలు చేసుకుంటోంది. ఇందులో భాగంగా మరో 60 మిలియన్ల డోసుల కోసం గ్లాక్సోస్మిత్​క్లైన్, సనోఫీ పాశ్చర్ సంస్థలతో ఒప్పందం చేసుకుంది.

కరోనా వ్యాక్సిన్ డోసులను ముందుగానే భారీ ఎత్తున కొనుగోలు చేస్తోంది యూకే ప్రభుత్వం. ఈ మేరకు గ్లాక్సోస్మిత్​క్లైన్(జీఎస్​కే), ఫ్రాన్స్​కి చెందిన సనోఫీ పాశ్చర్ సంస్థతో ఒప్పందం కుదుర్చుకుంది. ఈ సంస్థలు అభివృద్ధి చేస్తున్న ప్రయోగాత్మక టీకా 60 మిలియన్ల (ఆరు కోట్లు) డోసులు అందించేలా ఈ ముందస్తు ఒప్పందం చేసుకుంది.

ఫలితంగా.. హ్యూమన్ ట్రయల్స్​లో జీఎస్​కే, సనోఫీ వ్యాక్సిన్ క్యాండిడేట్లు సమర్థమని తేలితే.. ముందస్తుగానే యూకే వాటిని సొంతం చేసుకునే వీలుంటుంది. తద్వారా వైరస్ ముప్పు అధికంగా ఉన్నవారికి ముందుగానే వ్యాక్సిన్ అందించే అవకాశం లభిస్తుంది.

"ఇంతకుముందు ఎన్నడూ చూడనంత వేగంతో సురక్షితమైన, ప్రభావవంతమైన వ్యాక్సిన్​ను మా శాస్త్రవేత్తలు తయారుచేస్తున్నారు. ఇది గొప్ప పురోగతి అయినప్పటికీ.. దీనికి ఎలాంటి హామీలు లేవు. ఈ సమయంలో ప్రజల ప్రాణాలు కాపాడేందుకు జీఎస్​కే, సనోఫీ వంటి వ్యాక్సిన్ క్యాండిడేట్లను ముందుగానే పొందడం చాలా ముఖ్యం."

-అలోక్ శర్మ, యూకే వాణిజ్య మంత్రి

తాజా ఒప్పందంతో యూకే ప్రభుత్వం ఇప్పటివరకు 250 మిలియన్ల డోసులను సిద్ధం చేసుకున్నట్లైంది. ఇదివరకే బయోఎన్​టెక్/ఫైజర్​, వాల్నీవా, ఆస్ట్రాజెనెకా వంటి సంస్థలతో ఒప్పందం కుదుర్చుకుంది బ్రిటన్.

ప్రపంచంలోనే అతిపెద్ద వ్యాక్సిన్ తయారీ సామర్థ్యం ఈ రెండు సంస్థల సొంతం. డీఎన్​ఏ ఆధారిత సాంకేతికత ద్వారా ఈ 60 మిలియన్ల డోసులను తయారు చేయనున్నాయి సంస్థలు. సనోఫీ సంస్థ ఫ్లూ వ్యాక్సిన్​ను తయారు చేసిన పద్ధతిలోనే వీటిని ఉత్పత్తి చేయనుంది.

మరోవైపు.. భవిష్యత్తులో జరిగే వ్యాక్సిన్ ట్రయల్స్​లో పాల్గొనేందుకు 72 వేల మంది స్వచ్ఛందంగా ముందుకొచ్చారని ప్రభుత్వం పేర్కొంది. భారీ స్థాయిలో క్లినికల్ ట్రయల్స్​ నిర్వహించడం కోసం అక్టోబర్​ నాటికి 5 లక్షల మందిని సమీకరించడానికి ప్రయత్నిస్తుంది.

ఇదీ చదవండి-9 కోట్ల వ్యాక్సిన్ డోసుల కొనుగోలుకు బ్రిటన్ డీల్