అమెరికాకు అసాంజే అప్పగింతకు యూకే కోర్టు నో

వికీలీక్స్ వ్యవస్థాపకుడు జులియన్​ అసాంజేను తమకు అప్పగించాలన్న అమెరికా అభ్యర్థనను తోసిపుచ్చింది బ్రిటన్ కోర్టు. అలా చేస్తే 'క్రూరమైన చర్య' అవుతుందని న్యాయమూర్తి వ్యాఖ్యానించారు.

వికీలీక్స్ వ్యవస్థాపకుడు జులియన్​ అసాంజేను అమెరికాకు అప్పగించటానికి బ్రిటన్​ కోర్టు నిరాకరించింది. అలా చేయడాన్ని క్రూరమైన చర్యగా అభివర్ణించారు జిల్లా జడ్జి వనెస్సా బరైట్సర్. అసాంజే మానసిక స్థితిని దృష్టిలో ఉంచుకుని ఈ నిర్ణయం తీసుకున్నామని తెలిపారు. ఒకవేళ అమెరికాకు అప్పగిస్తే అసాంజే ఆత్మహత్య చేసుకునే అవకాశం ఉందన్నారు.

ఒక జర్నలిస్ట్​గా అసాంజే.. భావప్రకటనా స్వేచ్ఛలో భాగంగానే అమెరికా దౌత్యవిధానాలను బయటపెట్టారని ఆస్ట్రేలియా న్యాయవాది అన్నారు. అసాంజే చర్య భావప్రకటనా స్వేచ్ఛ కిందకు రాదని అమెరికా రక్షణ విభాగం చేసిన వ్యాఖ్యలను ఖండించారు.

అయితే బ్రిటన్​ కోర్టు నిర్ణయంపై తాము అప్పీల్​కు వెళ్తామని అమెరికా ప్రభుత్వం స్పష్టం చేసింది. అసాంజేపై 17 గూఢచర్య కేసులు ఉన్నాయని అమెరికన్ లాయర్లు కోర్టుకు వివరించారు. ఈ కేసుల్లో ఆయన 175 సంవత్సరాలు శిక్షపడే అవకాశం ఉందని చెప్పారు.

ఇదీ చదవండి :అసాంజే: పారదర్శకతకు ప్రతీకా? రాజద్రోహా?