అతి పిన్న వయసులోనే విమానంలో ప్రపంచాన్ని చుట్టేసిన మహిళగా రికార్డు సృష్టించడానికి 19 ఏళ్ల యువతి సాహసానికి పూనుకుంది. ఒకే సీటున్న లోహ విహంగంలో గాల్లోకి ఎగిరింది. ఈదురుగాలులు, మేఘావృతమైన ఆకాశంతో ప్రతికూల వాతావరణ పరిస్థితులు ఉన్నా వెరవక, తల్లిదండ్రులు వీడ్కోలు పలుకుతుండగా బుధవారం ప్రయాణాన్ని ప్రారంభించింది.
బెల్జియంలోని కొర్ట్రిజ్క్‌లో ఓ చిన్న విమాన స్థావరం నుంచి నింగికి ఎగిరిన ఆమె పేరు జారా రూథర్‌ఫోర్డ్‌. బెల్జియన్‌-బ్రిటిష్‌ యువతి అయిన జారా రెండు-మూడు నెలల ప్రయాణంలో ఐదు ఖండాలు, 52 దేశాల మీదుగా తన యాత్ర కొనసాగించనుంది. ఇందుకు తన షార్క్‌ స్పోర్ట్‌ మోడల్‌ విమానాన్ని ప్రత్యేకంగా సిద్ధం చేసుకుంది.