16 ఏళ్ల బాలిక ఫిన్లాండ్‌కు ప్రధాని కాగలదా? కానీ, అయ్యింది! బుధవారం ఉదయం బాధ్యతలు చేపట్టిన ఆమె.. ఆ వెంటనే కేబినెట్ మంత్రులు, చట్టసభ్యులు, అధికారులతో సమావేశం నిర్వహించింది. బాలికలకు సాంకేతిక పరిజ్ఞానాన్ని చేరువ చేయడం చాలా ముఖ్యమని, ప్రపంచ వ్యాప్తంగా నెలకొన్న ఈ సమస్యపై దృష్టి సారించాల్సిన అవసరముందని నొక్కి చెప్పింది. సాంకేతికంగా దూసుకెళ్తున్న ఫిన్లాండ్... బాలికలకు ఆ ఫలాలను అందించేందుకు ఏమేం చేయగలదన్న విషయమై ఆరా కూడా తీసింది!
ఆమె ప్రధాని ఎలా కాగలిగిందంటే...
ఈ నెల 11న 'అంతర్జాతీయ బాలికల దినోత్సవం'. దాన్ని పురస్కరించుకుని ఐరాస బుధవారం 'గర్ల్స్‌ టేకోవర్‌' కార్యక్రమం నిర్వహించింది. ఇందులో భాగంగా దక్షిణ ఫిన్లాండ్‌లోని వాక్సే గ్రామానికి చెందిన ఆవా ముర్టో(16) ఒక్కరోజు ప్రధానిగా బాధ్యతలు చేపట్టింది.