ఆ రైలులో వదిలేసిన రూ.కోటిన్నర గోల్డ్​ ఎవరిది?

లాక్​డౌన్​లోనూ బంగారం ధరలు ఆకాశాన్ని అంటుతున్నాయి. ఇలాంటి సమయంలో గుర్తుతెలియని కొందరు వ్యక్తులు కోటిన్నర రూపాయలు విలువైన పసిడిని రైలులో వదిలిపెట్టి వెళ్లిపోయారు. అయితే ఆ ప్యాకేజ్​ను స్వాధీనం చేసుకున్న అధికారులు.. వారి కోసం చాలా నెలలుగా ఎదురుచూస్తున్నారు. వివరాల్లోకి వెళ్తే...

రైలులో అక్రమంగా బంగారం తరలిస్తూ దొరికిన సంఘటనలు చాలానే టీవీల్లో చూస్తుంటాం. కోట్ల విలువైన విదేశీ బంగారం బిస్కెట్లను అధికారులు స్వాధీనం చేసుకుంటారు. పోలీసులకు దొరికిన వ్యక్తులను జైలుకు తరలిస్తారు. అయితే స్విట్జర్లాండ్​లో ఇలాంటి తరహా ఘటన ఒకటి జరిగింది. అయితే విచిత్రంగా రైలులో వదిలేసిన బంగారాన్ని యజమానులు వచ్చి తీసుకెళ్లాలని అభ్యర్థిస్తున్నారు పోలీసులు. ఇందుకోసం కొన్ని నెలలుగా ఎదురుచూస్తున్నారట.

ఐదేళ్ల సమయం..

స్విట్జర్లాండ్​లోని సెయింట్​ గాలెన్​ నుంచి లుసెర్నే బయలుదేరిన ఓ రైలులో భారీ ప్యాకెట్​ను స్వాధీనం చేసుకున్నారు రైల్వే పోలీసులు. ఈ సంఘటన గతేడాది అక్టోబర్​లో జరిగింది. అయితే దాన్ని తీసుకోవాలని ఇప్పటివరకు అధికారులు ఎన్నోసార్లు ప్రకటన చేసినా ఎవరూ రావట్లేదట. ఇందుకోసం ఎన్నో ప్రయత్నాలు చేసినా ఫలించకపోవడం వల్ల ఇటీవలె కోర్టును ఆశ్రయించారు. అయితే ఆ నిధి తీసుకునేందుకు 5 ఏళ్ల వరకు గడువు ఇస్తున్నట్లు న్యాయమూర్తి ప్రకటించారు. ఆ తర్వాత ఎవరూ తీసుకోకపోతే అది ప్రభుత్వ ఖజానాలో చేరనుంది.

గతంలోనూ ఇలాంటి సంఘటన ఒకటి జరిగింది. దాదాపు 500 యూరో నోట్ల కట్టలు ఓ రెస్టారెంట్​ బాత్​రూంలో వదిలేసి వెళ్లారు. అప్పట్లో ఆ విషయం బాగా చర్చనీయాంశమైంది.