ప్రపంచవ్యాప్తంగా కరోనా వైరస్‌ ఉద్ధృతి కొనసాగుతోంది. కేసులు 32 లక్షలు దాటగా.. 2 లక్షల 28 వేలమందికిపైగా బలయ్యారు. అమెరికాలో మహమ్మారి విజృంభణ తీవ్రరూపం దాల్చింది. రోజుకు 25 వేలకుపైగా కొత్త కేసులు బయటపడుతూనే ఉన్నాయి. అమెరికాలో మొత్తం కొవిడ్‌ కేసులు 10 లక్షల 65 వేలకు చేరువయ్యాయి. గడిచిన 24 గంటల్లోనే 2 వేల 502 మరణాలు సంభవించాయి. దేశంలో మృతుల సంఖ్య 61 వేలు దాటింది. లక్షా 47 వేలకుపైగా కోలుకున్నారు.
1955 నుంచి 1975 వరకు భీకరంగా సాగిన వియత్నాం యుద్ధంలో 58 వేల 200 మంది సైనికులు ప్రాణాలు కోల్పోగా... అంతకంటే ఎక్కువగా అమెరికన్లను కరోనా బలితీసుకుంది.
ఆ దేశాల్లో మళ్లీ...
ఐరోపా దేశాల్లోనూ వైరస్‌ వ్యాప్తి ఏమాత్రం తగ్గటం లేదు. స్పెయిన్‌లో.... మొత్తం కేసులు 2లక్షల 36 వేల 900కు చేరువకాగా... 24 వేల 275 మంది మృతిచెందారు. గడిచిన 24 గంటల్లో 453 మంది చనిపోయారు. రష్యాలోనూ కరోనా కేసుల సంఖ్య లక్షకు చేరువయ్యాయి. కొత్తగా 5 వేల 841 కేసులు నమోదవగా ఒక్కరోజే 105 మంది మృతి చెందారు.
- ఇటలీలో బుధవారం 323, యూకేలో 795 మంది కరోనా ధాటికి చనిపోయారు.
- ఇరాన్‌లో మొత్తం బాధితుల సంఖ్య 93వేల 657కు చేరింది. మరణాలు 5వేల 957కు పెరిగాయి.
- బ్రెజిల్‌లో మొత్తం కేసులు 79 వేల 361కు చేరాయి. కొత్తగా 448 మరణాలు నమోదవగా ఇప్పటివరకు 5వేల 511 మంది మృతిచెందారు.
- బెల్జియంలో మాత్రం కరోనా పంజా విసురుతూనే ఉంది. మొత్తం కేసులు 47 వేల 859కి చేరగా 7వేల 501 మంది మరణించారు.
- నెదర్లాండ్స్‌లో మొత్తం కేసులు.. 38వేల 802కు చేరగా...ఇప్పటిదాకా 4వేల 711 మంది మరణించారు.