'ఐఫోన్​ నన్ను 'గే'ను చేసింది- పరిహారం ఇవ్వండి!'

ఐఫోన్​ వల్ల స్వలింగ సంపర్కుడిగా మారిపోయానంటూ రష్యాలో ఓ వ్యక్తి కోర్టుకెక్కాడు. ఇందుకు యాపిల్ సంస్థ నైతిక బాధ్యత వహించాలంటూ ఫిర్యాదు చేశాడు. పరిహారంగా మిలియన్ రూబుల్స్​ చెల్లించాలని కోరాడు.

యాపిల్ ఐఫోన్​ వాడటం వల్ల తను స్వలింగ సంపర్కుడిగా మారిపోయానని ఆరోపించాడు రష్యాకు చెందిన ఓ వ్యక్తి. తను 'గే'గా మారడానికి యాపిల్ సంస్థ నైతిక బాధ్యత వహించాలని కోర్టుకెక్కాడు. తనకు జరిగిన నష్టానికి పరిహారంగా 1 మిలియన్ రూబుల్స్​(రష్యా కరెన్సీ)ను యాపిల్ సంస్థ చెల్లించాలని డిమాండ్ చేస్తూ మాస్కో కోర్టులో వ్యాజ్యం వేశాడు.

బిట్​కాయిన్ బదులు "గే కాయిన్"..

"నా స్మార్ట్​ఫోన్ యాప్​ నుంచి బిట్​కాయిన్​ కోసం ఆర్డర్ ఇస్తే 'గే కాయిన్' అనే క్రిప్టో కరెన్సీ వచ్చింది. ప్రయత్నించే వరకు దేనినీ నమ్మొద్దన్న ప్రకటనతో ఈ యాప్​లో ప్రత్యక్షమైంది. ప్రయత్నించే వరకు దేన్నీ నమ్మొద్దని నేను కూడా ఈ యాప్​లో స్వలింగ సంపర్కులతో బంధం ఏర్పరుచుకున్నాను. ఇప్పుడు నాకు ఓ బాయ్ ఫ్రెండ్ ఉన్నాడు. ఇది నా తల్లితండ్రులకు ఏ విధంగా చెప్పాలో అర్థం కావట్లేదు. నా జీవితం నాశనమైపోయింది. నా జీవితం మళ్లీ సాధారణ స్థితికి రాలేకపోవచ్చు. నన్ను ఈ విధంగా ఏమార్చి స్వలింగ సంపర్కానికి ఉసిగొల్పడానికి కారణం ఆపిల్​ సంస్థే. ఈ మార్పులు నైతికంగా, మానసికంగా నాకు హాని కలిగిస్తున్నాయి."
-బాధితుడి ఫిర్యాదు సారాంశం

"ఈ కేసు చాలా తీవ్రమైనది. బాధితుడు చాలా క్షోభ అనుభవిస్తున్నాడు. థర్డ్ పార్టీ యాప్​లను నియంత్రించాల్సిన బాధ్యత యాపిల్ సంస్థపై ఉంది."

-సపిఝట్ గుస్నీవా, బాధితుడి తరఫు న్యాయవాది

యాపిల్ సంస్థ ఇప్పటివరకు దీనిపై స్పందించలేదు. సెప్టెంబర్ 20న న్యాయస్థానంలో ఈ ఫిర్యాదు నమోదు కాగా అక్టోబర్ 17న వాదనలు జరగనున్నాయి.