Russia Ukraine war: ఉక్రెయిన్లోని పౌరులను తరలించే మానవతా కారిడార్ల ఏర్పాటు కోసం బుధవారం ఉదయం తాత్కాలిక కాల్పుల విరమణ ప్రకటించింది రష్యా. కీవ్తో పాటు పలు కీలక నగరాల్లో మానవతా కారిడార్ల ఏర్పాటులో భాగంగా కాల్పులకు విరామం ప్రకటించినట్లు స్పుత్నిక్ న్యూస్ తెలిపింది.
విదేశీయులతో పాటు ఉక్రెయిన్ పౌరులను తరలించేందుకు మానవతా కారిడార్లకు విఘాతం కలుగుతోందని ఇరు దేశాలు పరస్పర ఆరోపణలు చేసుకున్న క్రమంలో.. ఈ ప్రకటన వెలువడటం ప్రాధాన్యం సంతరించుకుంది. చెర్నిహివ్, సుమీ, ఖర్కివ్, మేరియుపొల్, జపోరిజియా నగరాల్లో బుధవారం కాల్పుల విరమణ పాటిస్తున్నట్లు మీడియా తెలిపింది.
"పౌరులను తరలించేందుకు రష్యా మరోమారు అవకాశం కల్పించింది. ఉక్రెయిన్ తక్షణమే స్పందించాలి. నిర్దిష్ట మార్గాల్లో 2022, మార్చి 9న ఉదయం 3 గంటల నుంచి ప్రారంభమవుతుంది. ఈ ప్రతిపాదనకు రాతపూర్వక ఆమోదంతో పాటు భద్రతకు భరోసా కల్పించాలని ప్రకటనలో పేర్కొంది."
- మైకేల్ మిజింత్సేవ్, మానవతా కారిడార్ హెడ్
సుమీ నగరంలో పౌరుల తరలింపు మంగళవారమే ప్రారంభమైంది. అలాగే.. కీవ్ నగరం వెలుపలి ప్రజలను సైతం తరలిస్తున్నారు.
సుమీ నుంచి భారత విద్యార్థుల తరలింపు..
భీకర దాడులకు నెలవైన ఉక్రెయిన్లోని సుమీ నగరం నుంచి భారత విద్యార్థులు బయటపడ్డారు. ఆపరేషన్ గంగలో భాగంగా వారిని భారత్కు తీసుకొచ్చేందుకు విమానాలు సిద్ధమవుతున్నట్లు విదేశాంగ శాఖ తెలిపింది. బస్సుల్లో 175 కిలోమీటర్ల దూరంలోని పోల్టావాకు తరలించినట్లు విదేశాంగ శాఖ ప్రతినిధి ఆరిందమ్ బాగ్చీ తెలిపారు. 'సుమీ నుంచి భారతీయ విద్యార్థులందరినీ తరలించటం సంతోషంగా ఉంది. వారంతా పోల్టావాకు వెళ్తున్నారు. అక్కడి నుంచి ట్రైన్ ద్వారా పశ్చిమ ఉక్రెయిన్కు చేరుకుంటారు. ఆపరేషన్ గంగలో భాగంగా నడిచే విమానాలు వారిని తీసుకొచ్చేందుకు సిద్ధమవుతున్నాయి' అని ట్వీట్ చేశారు. బస్సుల సమీపంలో విద్యార్థులు ఉన్న వీడియోను ట్విట్టర్లో పోస్ట్ చేశారు బాగ్చీ.
మరోవైపు.. సుమీ నగరంలోని పౌరులను తరలించేందుకు రష్యన్ ఫెడరేషన్ సేనలు కల్పించిన భద్రతను కొనియాడింది భారత్లోని రష్యా రాయబార కార్యాలయం. మొత్తం 723 మందిని సుమీ నుంచి పశ్చిమ ఉక్రెయిన్కు తరలించగా అందులో 576 మంది భారతీయులు, 115 మంది చైనా, 20 మంది జోర్డాన్, 12 మంది ట్యునీసియా దేశస్థులు ఉన్నట్లు పేర్కొంది.
రష్యాలో మెక్డొనాల్డ్స్ సేవలు బంద్..
ఉక్రెయిన్పై బాంబులతో విరుచుకుపడుతున్న రష్యాపై ఆంక్షల పర్వం కొనసాగుతోంది. తాజాగా రష్యాలోని తమ 850 రెస్టారెంట్లను తాత్కాలికంగా మూసివేస్తున్నట్లు ప్రకటించింది మెక్డొనాల్డ్స్. దీని ద్వారా ప్రభావితమయ్యే 62,000 మంది సంస్థ ఉద్యోగులకు వేతనాలు చెల్లించటం కొనసాగిస్తామని హామీ ఇచ్చింది. ఉక్రెయిన్లోని ప్రజల దయనీయ పరిస్థితి మరవలేనిదని పేర్కొన్నారు సంస్థ అధ్యక్షుడు, సీఈఓ క్రిస్ పేర్కొన్నారు. తమ స్టోర్లను తిరిగి ఎప్పుడు తెరుస్తామో కచ్చితంగా చెప్పలేమన్నారు. తమలాంటి అంతర్జాతీయ బ్రాండ్లకు ఇది చాలా క్లిష్టమైన పరిస్థితిగా పేర్కొన్నారు. మరోవైపు.. ఉక్రెయిన్లోని 108 రెస్టారెంట్లను ఇప్పటికే మూసివేసింది మెక్డొనాల్డ్స్.
స్టార్బక్స్ స్టోర్ల మూసివేత
రష్యాలోని 130 స్టోర్ల ద్వారా వచ్చే లాభాలను ఉక్రెయిన్కు సాయంగా ఇస్తున్నట్లు గత వారం ప్రకటించింది కువైట్కు చెందిన అల్సాయా గ్రూప్ సంస్థ స్టార్బక్స్. అయితే, తాజాగా.. ఆయా స్టోర్లను తాత్కాలికంగా మూసివేస్తున్నట్లు మంగళవారం తెలిపింది. అయితే, రష్యాలోని తమ స్టోర్లలో పనిచేస్తున్న 2వేల మంది సిబ్బందికి జీతాలు కొనసాగిస్తామని భరోసా కల్పించారు ఆ సంస్థ సీఈఓ కెవిన్ జాన్సన్.
కోకాకోలా, పెప్సికో..
ఉక్రెయిన్పై దాడికి నిరసనగా రష్యాలోని తమ వ్యాపారాన్ని నిలిపివేస్తున్నట్లు ప్రకటించింది కొకాకోలా సంస్థ. అలాగే.. పెప్సికో, సైతం రష్యాలో తమ వ్యాపారాలను పాక్షికంగా మూసివేస్తున్నట్లు ప్రకటించాయి. రష్యాలో తమ విక్రయాలను ఆపేస్తున్నట్లు తెలిపిన పెప్సీ.. మూలధన పెట్టుబడులు, ఇతర ప్రమోషనల్ కార్యకలాపాలను నిలిపివేస్తున్నట్లు పేర్కొంది. అయితే.. రష్యాలోని 20వేల మంది ఉద్యోగులు, 40వేల మంది రైతులకు మద్దతుగా.. పాలు, బేబీ ఫార్ములా, బేబీ ఫుడ్ తయారీని కొనసాగిస్తామని తెలిపింది.
జనరల్ ఎలక్ట్రిక్..
రష్యాలో తమ కార్యకలాపాలను పాక్షికంగా నిలిపివేస్తున్నట్లు ట్విట్టర్ ద్వారా వెల్లడించింది జనరల్ ఎలక్ట్రిక్. ఔషధ సామగ్రి, విద్యుత్తు సేవలకు ఇందులోకి మినహాయింపు ఇస్తున్నట్లు తెలిపింది.
పోలాండ్ ఆఫర్ తిరస్కరణ..
రష్యా భీకర దాడుల నేపథ్యంలో ఉక్రెయిన్కు మద్దతుగా నిలిచేందుకు ముందుకు వస్తున్నాయి పశ్చిమ దేశాలు. ఈ క్రమంలోనే రష్యా తయారు చేసిన ఫైటర్ జెట్స్ను ఉక్రెయిన్కు ఇవ్వనున్నట్లు తెలిపింది పోలాండ్. అయితే, ఈ ఆఫర్ను తిరస్కరించింది అమెరికా.
ఇదీ చూడండి:
