'ఉగ్రవాదంపై పోరుకు రష్యా సంపూర్ణ మద్దతు'

ఉగ్రవాద వ్యతిరేక పోరాటానికి భారత్​కు ఎల్లప్పుడూ మద్దతుగా ఉంటామని రష్యా మరోసారి స్పష్టం చేసింది. భారత సైనిక వ్యవస్థ బలోపేతానికి సహకారం అందించనున్నట్లు తెలిపింది రష్యా. కలష్నికోవ్​ ఏకే 203 రైఫిల్​లను భారత్​లో తయారు చేయడానికి సంసిద్ధం వ్యక్తం చేసింది.

ఉగ్రవాదంపై పోరులో భారత్​కు మద్దతుగా ఉంటామని మరోమారు స్పష్టం చేసింది చిరకాల మిత్ర దేశం రష్యా. తీవ్రవాద నిర్మూలనలో అన్ని విధాలుగా సహకరిస్తామని తెలిపింది.

భారత్​-రష్యా మధ్య సైనిక, సాంకేతిక సహకారంపై మాస్కోలో జరిగిన 19వ సమావేశంలో భారత రక్షణ మంత్రి రాజ్​నాథ్​ సింగ్, రష్యా రక్షణ మంత్రి జనరల్ సెర్గే షోయిగు పాల్గొన్నారు. 2021-2030 కాలానికి ఇరుదేశాల మధ్య సహకారానికి సంబంధించిన విషయాలపై చర్చించారు.

'భారతదేశ భద్రత ప్రయోజనాలకు అనుగుణంగా ఉగ్రవాద వ్యతిరేక పోరాటంలో అండగా ఉంటామని రష్యా మరోసారి స్పష్టం చేసింది. భారత సైనిక వ్యవస్థను అధునాతన సాంకేతికత ద్వారా మరింత పటిష్ఠం చేయడానికి మాస్కో కట్టుబడి ఉందని రష్యా రక్షణ మంత్రి పేర్కొన్నారు. రష్యా అందిస్తున్న సహకారానికి రాజ్​నాథ్​ సింగ్ ధన్యవాదాలు తెలిపారు. త్వరలో జరగబోయే ఇంద్ర సైనిక విన్యాసాలు ఇరుదేశాల బంధాన్ని మరింత బలోపేతం చేస్తాయని మంత్రులు ఆశాభావం వ్యక్తం చేశారు.'--భారత రక్షణ శాఖ

భారత్​లో ఏకే 203 తయారీ

కలష్నికోవ్​ ఏకే 203 రైఫిల్​లను భారత్​లో తయారు చేయడానికి రష్యా సంసిద్ధం వ్యక్తం చేసిందని భారత రక్షణ శాఖ వెల్లడించింది. ఇండో-రష్యా ప్రైవేట్ లిమిటెడ్ పేరుతో జాయింట్​ వెంచర్ కార్యచరణ ప్రారంభానికి సిద్ధంగా ఉన్నట్లు తెలిపింది.

సైనిక పరేడ్​కు ఆహ్వానం

రెండో ప్రపంచ యుద్ధంలో విజయం సాధించి 75 వసంతాలు గడిచిన సందర్భంగా త్వరలో జరిగే సైనిక పరేడ్​కు ప్రత్యేక అతిథిగా రాజ్​నాథ్​ను ఆహ్వానించారు రష్యా మంత్రి సెర్గే. ఈ వేడుకలకు భారత​ ప్రధాని నరేంద్ర మోదీని రష్యా అధ్యక్షుడు వ్లాదిమిర్​ పుతిన్​ ఇదివరకే ఆహ్వానించారు. ఈ ఆహ్వానానికి సానుకూలంగా స్పందించిన రాజ్​నాథ్​​ పరేడ్​కు భారత బృందం​ హాజరవుతుందని హామీ ఇచ్చారు.