Ukraine Russia War: ఉక్రెయిన్తో చర్చలు జరుపుతూనే దాడులను కొనసాగిస్తోంది రష్యా. ప్రపంచ దేశాలు ఆంక్షలను విధిస్తున్న అధ్యక్షుడు పుతిన్ పట్టువీడటం లేదు. ఉక్రెయిన్పై పోరుకు తాత్కాలిక విరామాలు ప్రకటిస్తూనే అంతకంటే భీకర దాడులతో విరుచుకుపడేలా ఆదేశాలు జారీ చేస్తున్నారు. ఇప్పటివరకు దాడి చేయని ప్రాంతాలను కూడా ధ్వంసం చేస్తూ రష్యన్ సేనలు విజృంభిస్తున్నాయి. పశ్చిమ ఉక్రెయిన్లోని వైమానిక స్థావరాలపై శుక్రవారం జరిపిన దాడులే అందుకు ఉదాహరణ.
ఎయిర్పోర్ట్పై దాడులు
మరియుపోల్లోని మెటర్నిటీ ఆస్పత్రిపై దాడులు జరిపి ముగ్గురు ప్రాణాలను బలి తీసుకున్న రష్యా.. పశ్చిమ ఉక్రెయిన్లోని విమానాశ్రయాలే లక్ష్యంగా శుక్రవారం భీకర దాడులు జరిపింది. లుట్సక్ వైమానిక స్థావరంపై జరిపిన దాడిలో ఇద్దరు అధికారులు మృతిచెందగా ఆరుగురు తీవ్రంగా గాయపడ్డారు. ఇవానో ఫ్రాంకిస్క్ ఎయిర్పోర్ట్పై బాంబు దాడులు జరిపారు రష్యన్లు. మరోవైపు కీవ్లో యుద్ధ ట్యాంకుల భారీ కాన్వాయ్ను రష్యా ఉపసంహరించుకుంది.
'అవును నిజమే'
ఉక్రెయిన్తో యుద్ధం నేపథ్యంలో ప్రత్యర్థిపై మరింత పట్టు సాధించేందుకు రష్యా.. ఇతర దేశాల నుంచి ఫైటర్లను రప్పిస్తోందంటూ గత కొద్దిరోజులుగా వార్తలు వస్తున్నాయి. తాజాగా పుతిన్ వీటిని ధ్రువీకరించారు. మధ్య ఆసియా దేశాలకు చెందిన వీరిని ఉక్రెయిన్కు తరలించాలని పుతిన్ ఆదేశించినట్లు రష్యా వర్గాలు వెల్లడించాయి.
ఉక్రెయిన్పై పోరాడేందుకు సిద్ధమంటూ స్వచ్ఛందంగా 16వేల మందికిపైగా రష్యాకు దరఖాస్తులు చేసుకున్నారని ఆ దేశ రక్షణ మంత్రి సెర్గీ షోయిగు వెల్లడించారు. వీరిలో చాలా మంది ఉగ్రవాద సంస్థ ఇస్లామిక్ స్టేట్పై పోరాడిన వారు అని పేర్కొన్నారు.
మరో అణుకేంద్రంపై దాడి..
ఉక్రెయిన్లోని అణు కేంద్రాలే లక్ష్యంగా రష్యా దాడులు చేపడుతోంది. ఇప్పటికే ఐరోపాలోని అతిపెద్ద అణు రియాక్టర్ అయిన జాపోరిషియాపై దాడి చేసిన రష్యా బలగాలు తాజాగా మరో అణుకేంద్రంపై దాడి చేశాయి. బాంబులతో ఖర్కివ్లోని అణు పరిశోధన కేంద్రంపైన రష్యా సేనలు విరుచుకుపడ్డాయి. ఈ విషయాన్ని ఉక్రెయిన్ అధికారులు శుక్రవారం వెల్లడించారు. ఈ దాడిలో యూనిట్లో విద్యుత్ సరఫరా అంతరాయం ఏర్పడటం సహా భవనం ముందుభాగం పూర్తిగా ధ్వంసమైనట్లు తెలిపారు.
మెటాపై ఆగ్రహం
ఉక్రెయిన్లో జీవాయుధాలు ఉన్నాయన్న తమ వాదనపై సమావేశం ఏర్పాటు చేయాలని ఐక్యరాజ్య భద్రతా మండలిని రష్యా విజ్ఞప్తి చేసింది. మరోవైపు.. రష్యన్ నేతలు, సైనికాధికారులను దూషించేందుకు అనుమతిస్తూ మేటా సంస్థ నిబంధనలను సవరించడంపై రష్యా ఆగ్రహం వ్యక్తం చేసింది. ఆ సంస్థపై క్రిమినల్ కేసు నమోదు చేస్తున్నట్లు ప్రకటించింది.
బైడెన్ ప్రకటన..
రష్యా వరుస ఆంక్షలను విధిస్తున్న అమెరికా.. మరో కీలక నిర్ణయం తీసుకుంది. ప్రస్తుతం రష్యాకు ఉన్న మోస్ట్ ఫేవర్డ్ నేషన్ ట్రేడ్ స్టేటస్ రద్దు చేయనుంది. ఈ మేరకు అధ్యక్షుడు జో బైడెన్ శుక్రవారం ప్రకటించనున్నారు. జీ7, ఐరోపా సమాఖ్య దేశాలతో కలిసి చర్చించాకే ఈ నిర్ణయం తీసుకున్నట్లు అమెరికా అధికార వర్గాలు వెల్లడించాయి. ఇది అమలులోకి వస్తే.. అమెరికా సహా మిత్ర దేశాలకు రష్యన్ దిగుమతులపై మరింత ఎక్కువగా సుంకాలు విధించే అవకాశం ఉంటుంది.
మరోవైపు ఉక్రెయిన్కు మద్దతుగా అమెరికా ఇప్పటికే 13.6 బిలియన్ డాలర్ల అత్యవసర ప్యాకేజీని ప్రకటించింది. వీటిలో దాదాపు సగం ఉక్రెయిన్కు ఆయుధాలు, సైనిక సాయం, తూర్పు ఐరోపా దేశాలకు అమెరికా బలగాలను పంపేందుకు ఖర్చుచేయనున్నారు. మిగిలిన దాంట్లో మానవతాసాయం, ఆర్థిక సాయం సహా రక్షణ బలోపేతం, విద్యుత్, సైబర్‌ సెక్యూరిటీ అవసరాల కోసం వెచ్చించనున్నారు.
ఇదీ చూడండి :ఉక్రెయిన్పై రష్యా బాంబుల వర్షం.. ప్రసూతి ఆసుపత్రి ధ్వంసం
