ఆర్థిక, రక్షణ రంగాల్లో సహకారంపై మోదీ-అబే చర్చలు

రష్యా పర్యటనలో భాగంగా జపాన్​, మలేషియా, మంగోలియా దేశాధినేతలతో ప్రధానమంత్రి నరేంద్ర మోదీ భేటీ అయ్యారు. ద్వైపాక్షిక సంబంధాలు, ఆర్థిక, రక్షణ రంగాల్లో సహకారంపై చర్చించారు.

రష్యా పర్యటన రెండో రోజున పలువురు దేశాధినేతలతో సమావేశమయ్యారు ప్రధాని నరేంద్ర మోదీ. తూర్పు ఆర్థిక వేదిక ఐదో సదస్సు కోసం వ్లాదివోస్తోక్ వెళ్లిన ప్రధాని... జపాన్, మలేషియా, మంగోలియా దేశాధినేతలతో విడివిడిగా చర్చలు జరిపారు.

జపాన్​ ప్రధానమంత్రి షింజో అబేతో భేటీ అయ్యారు మోదీ. ఆర్థిక, రక్షణ వంటి కీలక రంగాలతో పాటు అంకుర పరిశ్రమలు, 5జీ నెట్​వర్క్​, ప్రాంతీయ పరిస్థితులపై సమాచార మార్పిడి వంటి అంశాల్లో సహకారంపై చర్చించారు.

మలేషియా ప్రధానమంత్రి మహతిర్​ బిన్​ మొహమద్​, మంగోలియా అధ్యక్షుడు ఖల్టమాగిన్​ బటుల్గాతో సమావేశమయ్యారు మోదీ. ద్వైపాక్షిక సంబంధాల బలోపేతానికి తీసుకోవాల్సిన చర్యలపై ఇరువురితో చర్చలు జరిపారు.

ఇదీ చూడండి: బ్రిటన్​: ముందస్తు ఎన్నికల ప్రతిపాదన తిరస్కరణ