"ఓ" బ్లడ్ గ్రూప్ ఉన్న వారు కరోనా బారినపడే అవకాశం తక్కువని తాజా అధ్యయనాలు పేర్కొన్నాయి. ఒకవేళ వీరికి కరోనా సోకినా.. ఇతరులతో పోల్చితే తీవ్రత కూడా తక్కువేనని అధ్యయనాలు స్పష్టం చేశాయి.
బ్లడ్ అడ్వాన్సెస్ జర్నల్లో ఈ రెండు అధ్యయనాలు ప్రచురితమయ్యాయి. దీనితో బ్లడ్ గ్రూప్నకు, కరోనా బారినపడే అవకాశాలకు సంబంధం ఉందనేందుకు మరిన్ని ఆధారాలు లభించినట్టు అయ్యింది.
వారిలో ఎక్కువే...
తొలి అధ్యయనంలో.. డెన్మార్క్లో కరోనా సోకిన దాదాపు 4,70,000మంది హెల్త్ రిజిస్ట్రీ డేటాను.. 22లక్షల మంది సాధారణ జనాభా డేటాతో పోల్చి చూశారు పరిశోధకులు. కరోనా బారినపడ్డ వారిలో 'ఓ' బ్లడ్ గ్రూప్ ఉన్నవారు తక్కువగా ఉన్నట్టు.. ఏ,బీ,ఏబీ గ్రూప్ల వారు అధికంగా ఉన్నట్టు గుర్తించారు.
అయితే ఏ, బీ, ఏబీ బ్లడ్ గ్రూప్ల మధ్య కరోనా సోకే అవకాశంలో పెద్దగా వ్యత్యాసాన్ని చూడలేదన్నారు పరిశోధకులు.
కెనడాలో జరిగిన మరో అధ్యయనంలో.. ఓ, బీ బ్లడ్ గ్రూప్లతో పోల్చితే.. ఏ, ఏబీ బ్లడ్ గ్రూప్ల వారే అత్యధికంగా కరోనా బారినపడుతున్నట్టు తేలింది. వాంకోవర్ నగరంలోని ఆసుపత్రుల్లో ఆరోగ్య పరిస్థితి విషమించిన 95మంది రోగుల డేటాను పరిశీలించిన అనంతరం ఈ విషయం నిర్ధరించారు.
ఓ, బీ గ్రూప్లతో పోల్చితే.. మిగిలిన బ్లడ్ గ్రూప్ల వారికి అవయవాలు దెబ్బతినడం, విఫలమయ్యే అవకాశం కూడా ఎక్కవేనని ఈ అధ్యయనాలు సూచిస్తున్నాయి.
అయితే ఈ పూర్తి వ్యవహారంపై మరిన్ని పరిశోధనలు జరపాల్సిన అవసరం ఉందని శాస్త్రవేత్తలు చెప్పారు.
ఇదీ చూడండి:-కరోనా కుటుంబం నుంచి మరో వైరస్- ఇదీ చైనా నుంచే!
