పాకిస్థాన్లో కరోనా మహమ్మారి అంతకంతకూ విజృంభిస్తున్న తరుణంలో.. పాక్షిక లాక్డౌన్ విధించింది అక్కడి ప్రభుత్వం. ఇస్లామాబాద్ సహా.. వైరస్ వ్యాప్తి అధికంగా ఉన్న మరికొన్ని ప్రాంతాల్లో ఈ ఆంక్షలు అమల్లోకి వస్తాయని తెలిపింది. ఆ దేశంలో కరోనా పాజిటివిటీ రేటు 11శాతానికి చేరిన నేపథ్యంలో ఈ నిర్ణయం తీసుకుంది ఇమ్రాన్ సర్కార్. తూర్పు పంజాబ్ రాష్ట్రంలోని కొన్ని ప్రాంతాలకు ఏప్రిల్ 1 నుంచి ఈ ఆంక్షలు వర్తిస్తాయని స్థానిక అధికారులు వెల్లడించారు.
దేశ ఆర్థిక పరిస్థితులను దృష్టిలో ఉంచుకుని.. ఇప్పటివరకు లాక్డౌన్కు దూరంగా ఉంది ఇమ్రాన్ ప్రభుత్వం. అయితే.. ఇటీవల కరోనా విజృంభిస్తుండటం వల్ల ఆంక్షలు విధించక తప్పలేదు.
పాక్లో కొత్తగా 4,525 మంది వైరస్ బారినపడ్డారు. మొత్తం బాధితుల సంఖ్య 6.59 లక్షలకు చేరింది. మరో 41 మంది కొవిడ్కు బలవ్వగా.. మొత్తం మరణాల సంఖ్య 14,256కు పెరిగింది.
ఇదీ చదవండి:భారత్-పాక్ స్నేహగీతంపై చైనా హర్షం!
బ్రిటన్లో ఆంక్షల సడలింపు..
బ్రిటన్లో విధించిన తొలిదశ కరోనా లాక్డౌన్ ఆంక్షల్ని సడలిస్తున్నట్టు ఆ దేశ ప్రధాని బోరిస్ జాన్సన్ తెలిపారు. ఈ క్రమంలో మనం మరో దశకు చేరుకున్నామని, ఇలాంటి పరిస్థితుల్లో ప్రజలు మరింత అప్రమత్తంగా ఉండాలని ఆయన సూచించారు. ఆంక్షల సడలింపుతో ఇకపై ప్రజలు స్వేచ్ఛగా ఆటలాడుకోవచ్చన్న జాన్సన్.. ఈ వేసవి కాలం గొప్ప క్రీడాకాలం అవుతుందని చెప్పారు. అయితే.. ఇంటి నుంచి పనిచేస్తున్న వారు (వర్క్ ఫ్రమ్ హోం) యథాతథంగా కొనసాగించాలన్నారు. వైరస్ నియంత్రణకు అవసరమైన చర్యలను తప్పనిసరిగా చేపట్టాలని ఆయన సూచించారు.
"ఇంగ్లాండ్లో ఆంక్షల సడలింపుతో నేడు మనం మరో దశకు చేరుకున్నాం. దయచేసి కొత్త నియమాల్ని ప్రతి ఒక్కరూ తప్పనిసరిగా పాటించండి. తద్వారా మనం క్రమంగా సాధారణ స్థితికి చేరుకోవచ్చు."
- బోరిస్ జాన్సన్, బ్రిటన్ ప్రధాని
లాక్డౌన్ సడలింపు వల్ల ప్రజలు ముఖ్యంగా పిల్లలు కోల్పోయిన తమ ఆనందాన్ని తిరిగిపొందవచ్చు అని జాన్సన్ అన్నారు. ఫలితంగా.. అన్ని వయసుల వారు తమ జట్టు సభ్యులను మళ్లీ కలుసుకుని, కార్యకలాపాలను తిరిగి ప్రారంభిస్తారని ఆయన పేర్కొన్నారు.
ఇదీ చదవండి:నీటిలోకి 'ఎవర్ గివెన్' ముందు భాగం!
