'కొవిడ్​ను ఎదుర్కోగలమనే నమ్మకం వచ్చింది'

టీకాతో కరోనాను అంతం చేయగలమనే నమ్మకం వచ్చిందని ప్రపంచ ఆరోగ్య సంస్థ (డబ్ల్యూహెచ్​ఓ) పేర్కొంది. ఆక్స్​ఫర్ఢ్​ యూనివర్సిటీ అభివృద్ధి చేసిన టీకా 90శాతం సమర్థంగా పని చేస్తుందని ప్రకటించిన నేపథ్యంలో డబ్ల్యూహెచ్​ఓ చీఫ్​ టెడ్రోస్​ అథనోమ్​ ఈ వ్యాఖ్యలు చేశారు.

ప్రపంచ దేశాలను పట్టిపీడిస్తున్న కరోనాను రూపుమాపగలమనే నమ్మకం వచ్చిందని ప్రపంచ ఆరోగ్య సంస్థ (డబ్ల్యూహెచ్​ఓ) చీఫ్​ టెడ్రోస్​ అథనోమ్ అన్నారు. వైరస్​ను నివారించడానికి ఫార్మా దిగ్గజం ఆస్ట్రాజెనెకా, ఆక్స్​ఫర్డ్ యూనివర్సిటీ సంయుక్తంగా అభివృద్ధి చేసిన కరోనా టీకా 90శాతం సమర్థంగా పనిచేస్తున్నట్లు ఆ సంస్థ ప్రకటించిన నేపథ్యంలో ఆయన ఈ వ్యాఖ్యలు చేశారు. ఇప్పటికే ఫైజర్​, మోడెర్నా టీకాలు సమర్థంగా పని చేస్తున్నట్లు ప్రకటించగా... ఆది నుంచి ఆశాకిరణంగా మారిన ఆక్సఫర్డ్ టీకా​ మూడోదిగా అవతరించింది.

"చరిత్రలో ఏ వ్యాధికి​ ఇంత త్వరగా వ్యాక్సిన్ అభివృద్ధి జరగలేదు. వ్యాక్సిన్​ తయారీలో ఇదో గొప్ప విజయం. ఈ శాస్త్రీయపరమైన విజయం గురించి ప్రస్తావించకుండా ఉండలేం. టీకా అభివృద్ధిలో ఇదో మైలురాయిగా చెప్పవచ్చు. అయితే టీకా అందుబాటులోకి రావడం ఎంత కీలకమో.. పంపిణీ చేయడం కూడా అంతే కీలకమే."

- టెడ్రోస్​ అథనోమ్, డబ్ల్యూహెచ్​ఓ చీఫ్

వ్యాక్సిన్ అభివృద్ధి, పంపిణీలో ఎటువంటి అవకతవకలు జరగకుండా ఉండేందుకు, పేద దేశాలకు టీకా పంపిణీ సక్రమంగా జరిగేలా చూసేందుకు ఏర్పాటు చేసిన 'కొవిడ్-19 టూల్స్​'లో 187 దేశాలు చేరాయి. చవక ధరల్లో అన్ని దేశాలకు సకాలంలో వ్యాక్సిన్​ పంపిణీ చేసేలా జాగ్రత్తలు తీసుకుంటుంది డబ్ల్యూహెచ్​ఓ.

4.3 బిలియన్​ డాలర్లు అవసరం..

టీకా​ పంపిణీ, టెస్ట్​లు, చికిత్స కోసం 4.3 బిలియన్​ డాలర్లు తక్షణమే అవసరమని అథనోమ్​ పేర్కొన్నారు. వచ్చే ఏడాదికి అదనంగా 23.8 బిలియన్​ డాలర్లు అవసరమని తెలిపారు.

ఇదీ చూడండి:'చైనాను ఎదుర్కొవడంలో అమెరికాకు భారత్​ కీలకం'