బ్రిటన్‌లో ఇటీవల వెలుగుచూసిన కొత్త కరోనా వైరస్ తాజాగా మరో రెండు దేశాలకు పాకింది. ఇజ్రాయెల్, ఉత్తర ఐర్లాండ్లో ఈ రకం వైరస్ కేసులు బయటపడ్డాయి. ఇజ్రాయెల్లో నలుగురు వ్యక్తులు మార్పు చెందిన వైరస్ బారినపడగా.. వీరిలో ముగ్గురు ఇటీవల ఇంగ్లండ్‌ నుంచి వచ్చిన వారే. ప్రస్తుతం వీరంతా ఓ హోటల్‌లో నిర్బంధంలో ఉన్నట్లు అక్కడి ఆరోగ్యశాఖ వెల్లడించింది. ఉత్తర ఐర్లాండ్‌లోనూ ఓ కేసు నమోదైంది.
భారత్లోనూ గుబులు..
ఇక భారత్లోనూ మార్పు చెందిన వైరస్ కలవరపెడుతోంది. వైరస్ వ్యాప్తిని అరికట్టేందుకు ఈ నెల 23 అర్ధరాత్రి నుంచి 31 వరకు బ్రిటన్‌కు విమాన సర్వీసులను నిలిపివేసింది కేంద్రం. అంతకుముందు యూకే నుంచి వచ్చిన వారిలో పలువురికి కొవిడ్‌ పాజిటివ్గా నిర్ధరణ అయినందున.. దేశంలో అలజడి మొదలైంది. అయితే.. వీరికి సోకిన వైరస్ కొత్త రకమా? కాదా అన్నది తెలియరాలేదు. ప్రస్తుతం అడ్వాన్స్‌ పరీక్షల నిమిత్తం వీరి రక్త నమూనాలను వైరాలజీ ల్యాబ్‌లకు పంపారు. ఈ నేపథ్యంలో అన్ని రాష్ట్రాలు అప్రమత్తమయ్యాయి. యూకే నుంచి ఇటీవల వచ్చిన వారంతా కొన్ని వారాల పాటు ఐసోలేషన్‌లోనే ఉండాలని ప్రజలకు సూచించాయి.
ఇదీ చదవండి:మరో వేషంలో మహమ్మారి.. మరింత ప్రమాదకారి.!