కరోనా వైరస్ సోకిన వారిలో లక్షణాలకు సంబంధించి చాలా గందరగోళం నెలకొంది. ఈ మహమ్మారి కొంతమందిలో నిమోనియా లాంటి తీవ్ర అనారోగ్యానికి దారితీస్తుండగా.. మరికొంతమందిలో అసలు ఏ లక్షణాలు ఉండటం లేదు.
అయితే, వైరస్ సోకిన వారిలో 80 శాతం మందికిపైగా లక్షణాలు కనిపిస్తున్నాయని తాజా అధ్యయనం వెల్లడించింది. స్విట్జర్లాండ్ బెర్న్ విశ్వవిద్యాలయానికి చెందిన శాస్త్రవేత్తలు చేసిన పరిశోధనల్లో.. అసింప్టొమెటిక్ కేసులు చాలా తక్కువగా ఉన్నట్లు గుర్తించారు. ఈ ఫలితాలు పీఎల్ఓఎస్ మెడిసిన్ జర్నల్లో ప్రచురితమయ్యాయి.
తక్కువే..
కానీ, కరోనా లక్షణాలకు సంబంధించి పూర్తి స్థాయి అవగాహనకు రాలేకపోయామని స్పష్టం చేశారు పరిశోధకులు. అసింప్టొమెటిక్ కేసులకు సంబంధించి.. పరీక్ష నిర్వహించిన సమయంలో లక్షణాలు లేకపోయినా కొద్ది రోజుల తర్వాత వస్తున్నట్లు తెలిపారు. వీరు చేసిన అధ్యయనంలో 6,616 మందిలో 1,287 మాత్రమే అసింప్టొమెటిక్గా తేలినట్లు వెల్లడించారు.
ఇందులోనూ కొన్ని కారణాల వల్ల లక్షణాలు లేనివారి సంఖ్య మరింత తగ్గే అవకాశం ఉండొచ్చని శాస్త్రవేత్తలు భావిస్తున్నారు. వైరస్ శరీరంలో ఉన్నంత వరకు కనీసం 80 శాతం మందిలో లక్షణాలు కనిపించే అవకాశం కచ్చితంగా చెబుతున్నారు. అయితే, వీరంతా ఇతరులకు సోకకుండా జాగ్రత్త పడాల్సిన అవసరం ఉందని స్పష్టంచేశారు.