లాక్​డౌన్​కు స్వస్తి.. పర్యటక రంగం ప్రారంభం!

వేసవిలో పర్యటక సీజన్​ ప్రారంభం కానున్న నేపథ్యంలో లాక్​డౌన్​కు ముగింపు పలికేందుకు సిద్ధమైంది ఇటలీ. వచ్చే నెలలో తమ సరిహద్దులను తెరిచేందుకు నిర్ణయించింది. ఫలితంగా కుదేలైన ఆర్థిక వ్యవస్థకు ఊతమందించినట్లవుతుందని ఆశిస్తున్నారు అధికారులు.

కరోనా నియంత్రణలో భాగంగా విధించిన లాక్​డౌన్​కు ముగింపు పలికి.. వచ్చే నెలలో తమ సరిహద్దులను తెరవనున్నట్లు ఇటలీ ప్రభుత్వం స్పష్టం చేసింది. వేసవిలో పర్యటక సీజన్​ ప్రారంభమవుతున్న తరుణంలో ఈ నిర్ణయం తీసుకున్నట్లు అధికారులు తెలిపారు.

దేశీయ, అంతర్జాతీయ సరిహద్దులను జూన్​ 3 నుంచి తెరవనుంది ఇటలీ. విదేశాల నుంచి వచ్చే ఎవరికైనా 14 రోజుల నిర్బంధాన్ని తొలగిస్తున్నట్లు అధికారులు వెల్లడించారు. ఇటలీ స్థూల జాతీయోత్పత్తిలో 13 శాతం.. పర్యటక రంగం లాక్​డౌన్​ వల్ల క్షీణించింది. తాజాగా తీసుకున్న నిర్ణయంతో జీడీపీలో మెరుగుదల కనిపిస్తుందని ఆశిస్తోంది ప్రభుత్వం. టూరిజం నిర్వహకులూ ఈ నిర్ణయం కోసమే ఎదురు చూస్తున్నారు.

జర్మనీ నుంచి వెనిస్​ నగరానికి ఆస్ట్రియా మీదుగా 4 గంటల్లో ప్రయాణించవచ్చు. అయితే, జూన్​ 15 వరకు ఎవరూ విదేశాలకు వెళ్లొద్దని తమ ప్రజలకు ఆదేశాలు జారి చేసింది జర్మనీ ప్రభుత్వం.

ప్రమాదంలో లక్షల ఉద్యోగాలు...

ఏప్రిల్​ నాటికి పర్యటక రంగంలో లక్ష 6 వేల మంది ఉద్యోగాలు కోల్పోయారని ఇటలీ జాతీయ హోటల్​ సమాఖ్య తెలిపింది. వేసవిలో పర్యటకులను అనుమతించకపోతే.. లక్షల ఉద్యోగాలు ప్రమాదంలో పడతాయని వివరించింది.

లాక్​డౌన్​ కారణంగా పర్యటక కార్యకలాపాలను మూసేయడం వల్ల.. 10.8 బిలియన్​ డాలర్ల నష్టం వాటిల్లినట్లు ఓ అధ్యయనం తెలిపింది. గతేడాది మార్చి నుంచి మే వరకు విదేశీ పర్యటకంపై వచ్చిన ఆదాయంతో ఇది సమానమని పేర్కొంది.