కొన్ని దేశాల్లో తగ్గిన కరోనా ప్రభావం!

ప్రపంచవ్యాప్తంగా కరోనా వైరస్​ కేసులు అంతకంతకూ పెరుగుతున్నాయి. ఈ మహమ్మారి ధాటికి ఇప్పటివరకు దాదాపు 70వేల మంది మృత్యువాత పడ్డారు. మొత్తం 12.74లక్షల కేసులు నమోదయ్యాయి. 2.64లక్షల మంది కోలుకొని ఆసుపత్రుల నుంచి డిశ్చార్జి అయ్యారు. అయితే కొన్ని దేశాల్లో వైరస్​ ప్రభావం క్రమక్రమంగా పెరుగుతుండగా.. మరికొన్ని దేశాల్లో మాత్రం తగ్గుతోంది. వైరస్​ ప్రధాన కేంద్రమైన చైనాలోనూ కొత్త కేసులు నమోదవుతున్నాయి.

అమెరికా, స్పెయిన్​, ఇటలీ.. కరోనా ప్రభావం అత్యంత ఎక్కువగా ఉన్న దేశాలు. ఈ మహమ్మారితో ప్రపంచవ్యాప్తంగా దాదాపు 70వేల మంది మరణిస్తే.. ఈ మూడు దేశాల్లోనే 38,144‬ మంది మృత్యువాత పడ్డారు. కేసుల పరంగా చూస్తే.. మొత్తం 12.74లక్షల్లో 5,97,424‬ కేసులు అమెరికా, స్పెయిన్​, ఇటలీలోనే నమోదయ్యాయి. అయితే గతకొద్ది రోజుల గణాంకాలు ఆయా దేశాల ప్రజలకు కాస్త ఊరట కలిగిస్తున్నాయి. మృతులు, కేసుల సంఖ్యలో కాస్త తగ్గుదల నమోదవడమే ఇందుకు కారణం.

మొదటిసారి తగ్గాయి

యూఎస్​లో కరోనా కేంద్ర బిందువైన న్యూయార్క్​ నగరంలో రోజువారీ మరణాలు, ఐసీయూలో చేరే రోగులు, వెంటిలేటర్లు అవసరమయ్యే వారి సంఖ్యలో కాస్త తగ్గుదల నమోదైనట్లు వైద్యాధికారులు తెలిపారు. అటు ఇటలీ, స్పెయిన్​లోనూ కరోనా మరణాల సంఖ్య తగ్గింది. ఇటలీలో ఆదివారం 525 మంది ఈ వైరస్​ కాటుకు బలయ్యారు. దేశంలో గత రెండు వారాలకుపైగా రోజువారీ మరణాల సంఖ్యలో ఇదే అత్యల్పమని అధికారులు వెల్లడించారు. స్పెయిన్​లోనూ వరుసగా మూడోరోజు కరోనా కేసులతో పాటు మృతుల సంఖ్యలో తగ్గుదల నమోదైంది. స్పెయిన్​లో ఆదివారం 674 మంది ఈ మహమ్మారి సోకి ప్రాణాలు కోల్పోగా.. గత వారం రోజుల్లో ఈ సంఖ్య 800 కంటే తక్కువగా నమోదవడం ఇదే తొలిసారి.

వివిధ దేశాల్లో కరోనా కేసుల వివరాలు

బ్రిటన్​ పరిస్థితి మరోలా..

బ్రిటన్​లో మాత్రం పరిస్థితులు భిన్నంగా ఉన్నాయి. ఆదివారం ఆ దేశంలో రికార్డుస్థాయిలో 600 మంది మృత్యువాతపడ్డారు. అదే సమయంలో ఐరోపాలో కరోనా కేంద్రబిందువైన ఇటలీలో 525 మరణాలు నమోదయ్యాయి. అయినప్పటికీ ప్రపంచవ్యాప్తంగా అత్యధికంగా మరణించిన వారి జాబితాలో ఇటలీ మొదటిస్థానంలోనే ఉంది. జర్మనీ, ఫ్రాన్స్​లోనూ మృతులతో పాటు కేసుల సంఖ్య కూడా భారీగా పెరుగుతోంది.

చైనాలో కొత్తకేసులు

కరోనా కేంద్రబిందువైన చైనాలోనూ వైరస్​ మరోమారు విజృంభిస్తోంది. ఇప్పటికే చైనాలో దాదాపు 76,964 మంది ఈ మహమ్మారి బారిన పడి కోలుకోగా.. ఆదివారం ఒక్కరోజే కొత్తగా మరో 39 కేసులు గుర్తించారు అధికారులు. వీరిలో 38 మంది విదేశాల నుంచి వచ్చినవారేనని వెల్లడించారు. లక్షణాలు కనిపించని కరోనా కేసులూ పెరగడం ఆందోళన కలిగిస్తోంది.

దేశాధినేతల హెచ్చరికలు

కరోనా పాజిటివ్​గా తేలిన 10 రోజులకు బ్రిటన్ ప్రధాని బోరిస్​ ముందస్తు జాగ్రత్తగా ఆసుపత్రిలో చేరారు. ఇప్పటివరకూ స్వీయ నిర్బంధంలో ఉన్న ఆయన.. వైరస్​ లక్షణాలు పూర్తిగా పోనందున వైద్యుల సూచన మేరకు ఈ నిర్ణయం తీసుకున్నారు. ఈ సంక్షోభం నుంచి గట్టెక్కాలంటే ప్రజలంతా ఇళ్లకే పరిమితం కావాలన్నారు. మరోవైపు బ్రిటన్​ రాణి ఎలిజబెత్-2.. కరోనాపై తప్పక విజయం సాధిస్తామని దేశ ప్రజలకు సందేశమిచ్చారు.

అమెరికన్ల జీవితంలో రానున్న వారాలు మరింత కఠినంగా ఉండే అవకాశాలున్నాయని అధ్యక్షుడు డొనాల్డ్​ ట్రంప్​ హెచ్చరించారు. ప్రజలంతా ఇళ్లకే పరిమితమై.. సామాజిక దూరం పాటించాలని సూచించారు.