హిట్లర్ జ్ఞాపికలకు వేలంపాటలో రికార్డు ధర!

జర్మనీ నియంత అడాల్ఫ్ హిట్లర్​కు చెందిన చారిత్రక వస్తువులను మ్యూనిచ్​లో వేలం వేశారు. ప్రపంచవ్యాప్తంగా నిరసనలు వ్యక్తం అయినప్పటికీ.. జ్ఞాపికల వేలం అద్భుతంగా జరిగింది. హిట్లర్, అతని అనుయాయుల వస్తువులు.. వేల యూరోల ధర పలికాయి.

జర్మనీ మ్యూనిచ్​లో అడాల్ఫ్ హిట్లర్ జ్ఞాపికల వేలంపాట అట్టహాసంగా జరిగింది. దీనిపై అంతర్జాతీయంగా నిరసనలు వ్యక్తం అయినప్పటికీ నాజీ నియంత జ్ఞాపికలు వేల యూరోలు వసూలు చేశాయి.

హెర్మెన్​ హిస్టోరికా ఆక్షన్ హౌస్ ప్రకారం... వేలంపాటలో హిట్లర్​కు ఎంతో ఇష్టమైన టోపీ 50 వేల యూరోలకు అమ్ముడుపోయింది. హిట్లర్ భాగస్వామి ఎవా బ్రౌన్​ దుస్తులు కూడా వేలరూపాయల ధర పలికాయి.

'మైన్ కాంఫ్​'

హిట్లర్ రాసిన 'మైన్​ కాంఫ్​' గ్రంథాన్ని ఓ వ్యక్తి 1,30,000 యూరోలకు కొనుగోలుచేశాడు. వెండిపూతతో గద్ద, నాజీ పార్టీ చిహ్నం స్వస్తిక్​తో ఉన్న ఈ పుస్తకం సీనియర్ నాజీ హెర్మన్ గోరింగ్​కు చెందినది.

రెండో ప్రపంచయుద్ధంలో ప్రముఖపాత్ర వహించిన నాజీ నాయకులు హెన్రిచ్ హిమ్లెర్​, రుడాల్ఫ్ హెస్​లకు చెందిన వ్యక్తిగత వస్తువులు, దుస్తులు కూడా వేలంలో మంచి ధరకు అమ్ముడుపోయాయి.

నేరం ఇక్కడ చిన్న విషయం

"నాజీలు నేరాలు ఇక్కడ చిన్నవిషయంగా మారిపోయాయి. వేలం వేస్తున్నవారు సాధారణ చారిత్రక వస్తువులతో వర్తకం చేస్తున్నట్లుగా వ్యవహరిస్తున్నారు. అయితే నాజీలు విడిచిన జ్ఞాపకాలు.. నాజీ తత్వం ప్రజలపై పడే ప్రమాదం ఉంది." - ఫెలిక్స్ క్లీన్, జర్మనీ ప్రభుత్వ యాంటిసెమిటిజం కమిషనర్​

జర్మనీదే బాధ్యత

నాజీ వేలానికి ముందర... యూరోపియన్ యూదు అసోసియేషన్ ఛైర్మన్​ రబ్బీ మెనాచెం మార్గోలిన్ ఆందోళన వ్యక్తం చేశారు. ఐరోపాలో యూదు వ్యతిరేక ఘటనలకు జర్మనీయే పురిగొల్పిందని గుర్తు చేశారు. కనుక నాజీ వస్తువులను కొనుగోలు చేసిన వ్యక్తుల పేర్లను వేలందార్లు బహిర్గతం చేయాలని డిమాండ్ చేశారు. వారి అడుగుజాడలపై నిఘా ఉంచాలని జర్మనీని కోరారు.

ఇదీ చూడండి: ప్రశాంత్​కు సాయం కోసం పాక్​కు భారత్​ వినతి