Attack on Drone with Pickle jar: రష్యా యుద్ధ ట్యాంకర్ను ఎత్తుకెళ్లిన ఉక్రెయిన్ రైతు.. ఆరు విమానాల్ని కూల్చేసిన ఒకే ఒక్కడు.. ఇలా ఎన్నో వార్తలు కొన్ని రోజులుగా చక్కర్లు కొడుతున్నాయి. వీటిలో కొన్నింటి గురించి వినడమే తప్ప.. సరైన ఆధారాలు ఎక్కడా లేవు. బలమైన రష్యా సేనపై పోరాడుతున్న ఉక్రెయిన్ సైనికులు, పౌరుల్లో కదనోత్సాహం నింపేందుకు ఇలాంటి కథనాలు వ్యాప్తి చెందుతున్నాయన్న వాదనల మధ్య మరో వార్త అందరి దృష్టినీ ఆకర్షించింది. ఓ వృద్ధురాలు టమాట ఊరగాయ సీసాతో రష్యా డ్రోన్ను కూల్చేసిందన్నది దాని సారాంశం.
సీసాతో డ్రోన్ను కూల్చేయడంపై రకరకాల కథనాలు చక్కర్లు కొట్టినా.. అది నిజం కాకపోవచ్చని ఎక్కడో ఓ అనుమానం ఉండేది. అయితే.. అది ముమ్మాటికీ సత్యం అంటూ ఓ మహిళ ఉక్రెయిన్కు చెందిన లిగా.లైఫ్ వార్తా సంస్థను సంప్రదించింది. ఆ పని చేసింది తానేనంటూ.. అసలు ఏం జరిగిందో పూసగుచ్చినట్లు చెప్పింది. ఆ వివరాలు ఆమె మాటల్లోనే...
grandma drone pickle attack
"నా పేరు ఎలీనా. గతంలో జర్నలిస్టుగా చేశా. తర్వాత వ్యాపారవేత్తగా మారాను. ఓరోజు కీవ్లోని నా ఇంటి బాల్కనీలో కూర్చుని సిగరెట్ తాగుతున్నా. అప్పుడు జయ్.. అంటూ ఏదో శబ్దం వినిపించింది. చూస్తే ఏదో ఎగురుతూ కనిపించింది. పక్షి అనుకున్నా. కానీ కాదు. చుట్టూ ఏం ఉన్నాయా అని చూస్తే.. కుర్చీ కింద టమాట ఊరగాయ సీసా ఉంది. దాన్ని తీసి బలంగా డ్రోన్పై విసిరా. అది కిందపడి ముక్కలైంది. రోడ్డుపై పడిన శకలాలు అన్నింటినీ ఊడ్చేశా. డ్రోన్ విడిభాగాలను వేర్వేరు చెత్త బుట్టల్లో వేశా. అన్నీ ఒకే దగ్గరే పెడితే అది ఇంకా పనిచేస్తుందేమో, మన సమాచారం రికార్డ్ చేసి పంపుతుందేమోనని ఇలా చేశా." అని ఎలీనా చెప్పినట్లు ఆ వార్తా సంస్థ కథనం ప్రచురించింది. అయితే.. ఇదంతా ఎప్పుడు జరిగిందో మాత్రం చెప్పలేదు.
అది కీరా కాదు.. టమాట!