జీ7 విదేశాంగ మంత్రుల ప్రత్యక్ష భేటీ

రెండేళ్ల తర్వాత తొలిసారి జీ7 దేశాల విదేశాంగ మంత్రులు లండన్​లో ప్రత్యక్షంగా సమావేశమయ్యారు. చైనా, రష్యా దూకుడు, వాతావరణ మార్పులు వంటి అంతర్జాతీయ అంశాలపై వీరంతా చర్చించనున్నారు. ఆతిథ్య దేశ హోదాలో భారత్ ఈ సమావేశంలో పాల్గొంది.

గ్రూప్ ఆఫ్ సెవెన్(జీ7) దేశాల విదేశాంగ మంత్రులు లండన్​లో సమావేశమయ్యారు. రెండేళ్ల వ్యవధిలో తొలిసారి ప్రత్యక్ష సమావేశం నిర్వహించారు. వాతావరణ మార్పులు, చైనా అంశమే ప్రధాన అజెండాగా ఈ సమావేశం జరుగుతోంది. జీ7 శాశ్వత దేశాలతో పాటు ఆతిథ్య దేశాల హోదాలో భారత్, ఆస్ట్రేలియా, దక్షిణ కొరియా, దక్షిణాఫ్రికా.. ఈ భేటీకి హాజరయ్యాయి.

రెండు రోజుల పాటు జరిగే ఈ సమావేశంలో ఆయా దేశాల ప్రతినిధులు వివిధ అంశాలపై చర్చించనున్నారు. మయన్మార్ సైనిక తిరుగుబాటు, సిరియాలో మానవహక్కుల ఉల్లంఘన, ఇథియోపియాలో టిగ్రే సంక్షోభం, అఫ్గాన్​లో పరిస్థితులపై సమాలోచనలు జరపనున్నారు. ఉక్రెయిన్​తో సరిహద్దు వెంబడి రష్యా తన సైన్యాన్ని మెహరించడం, విపక్ష నేత అలెక్సీ నావల్నీని నిర్బంధించడంపైనా జీ7 చర్చిస్తుందని యూకే విదేశాంగ కార్యాలయం వెల్లడించింది.

వన్నెతరగని జీ7!

జీ7 కూటమికి అంతర్జాతీయ వేదికపై ఇప్పటికీ పలుకుబడి ఉందని ఆతిథ్య బ్రిటన్ బ్రిటన్ భావిస్తోంది. రష్యా, చైనా, ఇరాన్ దేశాల దూకుడు ప్రజాస్వామ్య దేశాలకు ముప్పుగా పరిణమిస్తోందని హెచ్చరిస్తోంది. ఈ నేపథ్యంలో జరుగుతున్న సమావేశాలకు ప్రాధాన్యం ఏర్పడింది.

ఈ సందర్భంగా మాట్లాడిన యూకే విదేశీ వ్యవహారాల మంత్రి డామినిక్ రాబ్.. విదేశాంగ నీతి పునరాగమనాన్ని ఈ భేటీ సూచిస్తోందని పేర్కొన్నారు.

"వర్తక, వాణిజ్యాలు అందరికీ అందుబాటులో ఉండాలని జీ7 విశ్వసిస్తుంది. సమాజం కోసం, మానవ హక్కుల కోసం, ప్రజాస్వామ్యం కోసం బలంగా నిలబడటాన్ని మేం విశ్వసిస్తాం. ప్రజలకు మంచి చేయడం, వారిని సంరక్షించడాన్ని నమ్ముతాం."

-డామినిక్ రాబ్, యూకే విదేశాంగ మంత్రి

అంతర్జాతీయ కూటములకు అమెరికా ప్రాధాన్యం ఇస్తోందని ఆ దేశ విదేశాంగ మంత్రి ఆంటోనీ బ్లింకెన్ పేర్కొన్నారు. చైనాను బలమైన స్థానం నుంచి ఎదుర్కోవడం అంటే.. భాగస్వామ్య దేశాలతో కలిసి పనిచేయడమేనని అన్నారు.

ఇదీ చదవండి:మోదీ- జాన్సన్​​ వర్చువల్ భేటీ.. పదేళ్ల రోడ్​మ్యాప్​ విడుదల