ప్రధాని​పై విమర్శల వెల్లువ.. కారణం ఆయనే!

కరోనా కట్టడికి ప్రపంచవ్యాప్తంగా పలు దేశాలు లాక్​డౌన్​ పాటిస్తున్నాయి. ప్రజలు తప్పనిసరిగా ఆంక్షలకు లోబడి ఉండాలని, లేదంటే కఠిన చర్యలు తప్పవని హెచ్చరిస్తున్నాయి. అయితే... బ్రిటన్​​ ప్రభుత్వంలోని ఓ ఉన్నత స్థాయి అధికారి లాక్​డౌన్​ ఆంక్షలు ఉల్లంఘించారు. ఆ అధికారిపై ప్రధాని బోరిస్​ జాన్సన్​ ఎలాంటి చర్యలు తీసుకోకపోవటంపై సర్వత్రా విమర్శలు వెలువెత్తుతున్నాయి.

బ్రిటన్​ ప్రభుత్వంలోని ఉన్నతాధికారి డొమినిక్​ కమ్మింగ్స్​ లాక్​డౌన్​ నియమాలను ఉల్లంఘించి 260 కిలోమీటర్లు ప్రయాణించటంపై విమర్శలు వెల్లువెత్తుతున్నాయి. అవకాశాన్ని అందిపుచ్చుకున్న విపక్షాలు ప్రధానమంత్రి బోరిస్​ జాన్సన్​పై విమర్శనాస్త్రాలు ఎక్కుపెట్టాయి. కమ్మింగ్స్​పై ప్రధాని ఎలాంటి చర్యలు తీసుకోకపోవటం... కరోనా సమయంలో బ్రిటీష్​ ప్రజల త్యాగాలను అవమానించటమేనని మండిపడ్డాయి.

" ఇది ప్రధానమంత్రికి పరీక్ష. అందులో ఆయన విఫలమయ్యారు. డొమినిక్​ కమ్మింగ్స్​పై బోరిస్​ జాన్సన్​ ఎలాంటి చర్యలు తీసుకోకపోవటం అనేది ప్రజలు చేసిన త్యాగాలను అవమానించటమే. "

– కేయిర్​ స్టార్మెర్​, ప్రతిపక్ష లేబర్​ పార్టీ నేత

బోరిస్​కు ఈ విషయంలో సొంత పార్టీ ఎంపీల నుంచీ విమర్శలు ఎదురయ్యాయి. ప్రధాని ప్రధాన వ్యూహ సలహాదారు కమ్మింగ్స్​ను విధుల్లో నుంచి తొలగించాలని కోరుతున్న అధికార కన్సర్వేటివ్​ పార్టీ పార్లమెంటు సభ్యుల సంఖ్య పెరుగుతోంది.

బ్రిటన్​ విదేశీ కార్యదర్శి భారత సంతతికి చెందిన లీసా నంది కూడా ప్రధానిపై విమర్శలు గుప్పించారు. కమ్మింగ్స్​పై చర్యలు తీసుకోకపోవటం వల్ల ప్రధాని తన స్నేహితులకు ఒక నిబంధన​, ఇతరులకు ఒక నిబంధన​ ఉందని నిరూపించారని ఆరోపించారు.

ప్రజాప్రయోజనాలను పక్కనపెట్టి రాజకీయ ఆసక్తిపైనే ప్రధాని దృష్టిపెట్టారని ఆరోపించారు స్కాట్లాండ్​ తొలి మంత్రి నకోలా స్టార్జియన్​. ప్రజా ఆరోగ్య సందేశం, సలహా ప్రస్తుతం సమయంలో ముఖ్యమైనప్పుడు దాని పరిణామాలు తీవ్రంగా ఉంటాయని పేర్కొన్నారు.

ఓ తండ్రి చేసే పనే చేశారు..

కరోనా వైరస్​పై రోజువారీ ప్రకటనలో భాగంగా ఆదివారం సాయంత్రం ప్రధాని బోరిస్​ జాన్సన్​.. తన ప్రధాన సలహాదారులపై చర్యలకు బదులు.. ఆయన్ను వెనుకేసుకొచ్చారు. కరోనా మహమ్మారి సమయంలో ఓ తండ్రి చేసే పనే ఆయన చేశారని సమర్థించారు. తన కుమారుడికి కరోనా లక్షణాలు బయటపడిన నేపథ్యంలోనే ప్రయాణం చేసినట్లు తెలిపారు.

సామాజిక మాధ్యమాల్లో

నెట్టింట్లోనూ ప్రధాని బోరిస్​పై విమర్శలు వెల్లువెత్తాయి. ప్రధాని అహంకారపూరితంగా వ్యవహరిస్తున్నారని ఆరోపించారు పలువురు నెటిజన్లు. "అహంకారం, నేరం, ఇలాంటి నిజాలను మార్చే వారితో పనిచేయటం మీరు ఊహించగలరా?" అని ట్విట్టర్​లో ఓ నెటిజన్​ విమర్శించగా.. అది వేల సార్లు షేర్​ అయింది.