హెలికాప్టర్ ప్రమాదంలో ఫ్రాన్స్ ఎంపీ మృతి

హెలికాప్టర్ ప్రమాదంలో ఫ్రాన్స్ బిలియనీర్, ఎంపీ ఓలివియర్ డసాల్ట్ ప్రాణాలు కోల్పోయారు. రఫేల్ యుద్ధవిమానాలు తయారు చేసే సంస్థ ఆయన కుటుంబం అధీనంలోనే ఉంది.

ఫ్రాన్స్​ కుబేరుడు, ఆ దేశ పార్లమెంట్ సభ్యుడు ఓలివియర్ డసాల్ట్ మరణించారు. హెలికాప్టర్ ప్రమాదంలో ఆయన ప్రాణాలు కోల్పోయారు. దక్షిణ ఫ్రాన్స్​ నార్మండీలోని కాలావ్డోస్ ప్రాంతంలో ఈ ఘటన జరిగినట్లు ఫ్రెంచ్ మీడియా పేర్కొంది.

శుక్రవారం పారిస్​లో జరిగిన ఓ కార్యక్రమంలో ఫ్రాన్స్ ప్రధాని జీన్ కాస్టెక్స్​తో కలిసి కనిపించారు డసాల్ట్. కాగా, ఆయన మృతిపై విచారం వ్యక్తం చేశారు ఆ దేశ అధ్యక్షుడు ఇమ్మాన్యూయెల్ మేక్రాన్. దేశ సేవలో డసాల్ట్ ఎప్పుడూ వెనకడుగు వేయలేదని కీర్తించారు. ఆయన మరణం తీరని లోటని పేర్కొన్నారు.

69 ఏళ్ల డసాల్ట్ రిపబ్లికన్స్ పార్టీ సభ్యుడు. బిలియనీర్ వ్యాపారవేత్త అయిన సెర్గె డసాల్ట్​కు ఈయన పెద్ద కుమారుడు. రఫేల్ యుద్ధవిమానాలు తయారు చేసే డసాల్ట్ ఏవియేషన్ సంస్థ వీరి గ్రూప్ అధీనంలోనే ఉంది. 2002 నుంచి పార్లమెంట్ సభ్యుడిగా కొనసాగుతున్నారు. ఆయన తాత మార్సెల్.. ఓ ఏరోనాటికల్ ఇంజినీర్. మొదటి ప్రపంచ యుద్ధంలో ఫ్రెంచ్ దళాలు ఉపయోగించిన విమానాల ప్రొపెల్లర్​లను ఆయనే తయారు చేశారు. అక్కడి నుంచి వీరి వ్యాపార సామ్రాజ్యం మొదలైంది.

ఇదీ చదవండి:'సైబర్​ సామర్థ్యాలను మెరుగుపరిచే వ్యవస్థ అవసరం'