చైనాలో తగ్గుముఖం పట్టిన భయంకర మహమ్మారి కొవిడ్-19 ప్రస్తుతం ఐరోపాలో విస్తరిస్తోంది. ఇటలీ సహా పలు ఐరోపా దేశాల ప్రజలకు కంటిమీద కునుకు లేకుండా చేస్తోంది. ఈ నేపథ్యంలో ప్రపంచ ఆరోగ్య సంస్థ కీలక వ్యాఖ్యలు చేసింది. ఐరోపా ఇప్పుడు ఈ వైరస్కు కేంద్ర బిందువుగా మారిందని ప్రకటించింది.
ఈ మేరకు వర్చువల్ విలేకరుల సమావేశం నిర్వహించిన డబ్ల్యూహెచ్ఓ చీఫ్ టెడ్రోస్ అధనామ్ ఈ ప్రకటన చేశారు. ప్రపంచవ్యాప్తంగా వైరస్ ధాటికి 5 వేల మంది మరణించడాన్ని 'విషాదకరమైన మైలురాయి'గా అభివర్ణించారు.