కొవిడ్ సోకితే రోగనిరోధక శక్తి తీవ్రంగా ప్రభావితం అవుతున్నట్లు పరిశోధకులు గుర్తించారు. రోగ నిరోధక కణాల సామర్థ్యాన్ని ఇది బలహీనపరుస్తోందని.. ఫలితంగా అనుబంధ ఆరోగ్య సమస్యలు(Post Covid Complications) తలెత్తినప్పుడు అవి స్పందించే తీరులో మార్పులు వస్తున్నాయని పేర్కొన్నారు.
మ్యూనిచ్‌లోని లూడ్విగ్‌ మాక్సిమిలియన్‌ విశ్వవిద్యాలయ పరిశోధకులు ఈ విషయాన్ని గుర్తించారు. విశ్వవిద్యాలయ బయోమెడికల్‌ సెంటర్‌లోని ఇమ్యూనాలజీ ప్రొఫెసర్‌ అన్నె క్రూగ్‌ ఈ పరిశోధనకు నేతృత్వం వహించారు.
వైరస్‌ కారణంగా రోగనిరోధక శక్తిపై పడుతున్న అదృశ్య దుష్ప్రభావాలను(Covid complications) కనుక్కోవడమే లక్ష్యంగా ఈ పరిశోధన సాగింది. ఈ పరిశోధన ఫలితాలను పీఎల్‌వోఎస్‌ పాథోజెన్స్‌ జర్నల్‌లో ప్రచురించారు.
పరిశోధన ఫలితాలు ఇలా..
సార్స్‌ కోవ్-2 సోకిన వారిలో 3 నుంచి 10 శాతం రోగులకు మధ్య స్థాయి లక్షణాలు కనిపిస్తున్నాయి. ఇలాంటి వారిలో వైరస్‌పై రోగనిరోధక శక్తి తీవ్రంగా స్పందిస్తోంది. ఇది శరీరంలోని కీలక వ్యవస్థల్లో వాపును పుట్టిస్తోంది. నరాల లోపల రక్తం గడ్డలు కట్టేందుకు కారణం అవుతోంది. ఫలితంగా ఇది గుండెపై ప్రతికూల ప్రభావం చూపిస్తోన్నట్లు గుర్తించారు.