కరోనాపై పోరు: జీ20 మంత్రుల కీలక నిర్ణయం

కరోనా సంక్షోభంపై జీ20 దేశాల వాణిజ్య శాఖ మంత్రులు వీడియో కాన్ఫరెన్స్ నిర్వహించారు. ముఖ్యమైన ఔషధాలు, ఇతర నిత్యావసరాల రవాణాకు అంతరాయం కలగకుండా చూడాలని తీర్మానించారు.

ప్రపంచవ్యాప్తంగా కరోనా విజృంభిస్తోన్న క్రమంలో ముఖ్యమైన ఔషధాలు, ఇతర నిత్యావసర వస్తువుల సరఫరా విషయంలో ఎలాంటి అంతరాయం లేకుండా చూసేందుకు.. జీ-20 దేశాల వాణిజ్య, పెట్టుబడి శాఖ మంత్రులు అంగీకరించారు. వీడియో కాన్ఫరెన్స్ ద్వారా నిర్వహంచిన చర్చల అనంతరం ఈమేరకు సంయుక్త ప్రకటన చేశారు. అవసరమైన వైద్య సామగ్రి తక్కువ ధరకు అందేలా చర్యలు చేపట్టాలని ఈ సదస్సులో తీర్మానించారు.

కరోనా మహమ్మారిపై వ్యక్తిగతంగా, సమష్టిగా పోరాడుతూనే.. అంతర్జాతీయ వాణిజ్యం, పెట్టుబడులపై ఆ ప్రభావం పడకుండా ప్రయత్నం చేస్తాం. సుస్థిరమైన వాణిజ్యం, పెట్టుబడి వాతావరణాన్ని అందించేందుకు కలిసి పని చేస్తాం. మార్కెట్లనూ తెరిచి ఉంచేలా చూస్తాం.

-జీ 20 దేశాల మంత్రులు

వైరస్​ వ్యాప్తిని నియంత్రించడానికి చేసే ప్రయత్నాలకు భంగం వాటిల్లకుండానే.. వాయు, సముద్ర, తదితర రవాణా వ్యవస్థను నడిపించే మార్గాలను అన్వేషిస్తున్నట్లు పేర్కొన్నారు. సరిహద్దుల్లోని ఆరోగ్య సిబ్బంది, వ్యాపారుల ప్రయాణాలకు ఎలాంటి ఆటంకం కలగకుండా ఉండేందుకు ప్రయత్నిస్తున్నట్లు వివరించారు. వాణిజ్యంపై మహమ్మారి చూపిస్తున్న ప్రభావాన్నీ పర్యవేక్షిస్తున్నట్లు తెలిపారు.