కార్చిచ్చులా కరోనా వ్యాప్తి- 20 లక్షలు దాటిన కేసులు

ప్రపంచవ్యాప్తంగా కరోనా వైరస్​ కేసులు 20లక్షలు దాటాయి. అత్యధికంగా అమెరికాలో 6లక్షల మందికి పైగా వైరస్​ బారిన పడ్డారు. కొవిడ్​-19​ ధాటికి ప్రపంచవ్యాప్తంగా మొత్తం లక్షా 26వేల మందికి పైగా మృత్యువాతపడ్డారు. మరో 4.84 లక్షల మంది ఈ మహమ్మారి బారి నుంచి పూర్తిగా కోలుకున్నారు.

కరోనా మహమ్మారి ప్రపంచ దేశాలపై కార్చిచ్చులా విరుచుకుపడుతోంది. భూభాగమంతా వైరస్ చాపకింద నీరులా విస్తరిస్తున్నందున.. ప్రపంచవ్యాప్తంగా ఈ మహమ్మారి కేసులు 20 లక్షలు దాటాయి. ఇందులో అత్యధికంగా అమెరికాలో 6 లక్షలకుపైగా కేసులు నమోదయ్యాయి. స్పెయిన్​ (1.74 లక్షలు), ఇటలీ (1.62 లక్షలు), ఫ్రాన్స్​ (1.43 లక్షలు), జర్మనీ (1.32 లక్షలు), బ్రిటన్​ (93,873), చైనా (82,295), ఇరాన్​-74,877 కేసులతో వరుసగా ఆ తర్వాతి స్థానాల్లో నిలిచాయి.

కరోనా మృతుల సంఖ్య కూడా గణనీయంగా పెరుగుతోంది. వైరస్​తో ప్రపంచవ్యాప్తంగా ఇప్పటికే లక్షా 26వేల మందికి పైగా మృత్యువాతపడ్డారు. ఈ జాబితాలోనూ 26వేలకు పైగా మరణాలతో అమెరికా అగ్రస్థానంలో నిలిచింది. ఇటలీ (21,067), స్పెయిన్​(18,255), ఫ్రాన్స్​ (15,729), బ్రిటన్​ (12,107)లు తర్వాతి స్థానాల్లో ఉన్నాయి. ప్రపంచవ్యాప్తంగా ఇప్పటివరకు మొత్తం 4,84,729 మంది కోరనా నుంచి కోలుకున్నారు.

6వేలకు చేరువలో పాకిస్థాన్​

పొరుగుదేశం పాకిస్థాన్​లోనూ కొవిడ్​-19 కేసులు రోజురోజుకూ పెరుగుతున్నాయి. తాజాగా మరో 151 మందికి వైరస్​ పాజిటివ్​గా వచ్చినందున మొత్తం కరోనా కేసుల 6వేలకు చేరువైంది. పాక్​లో ఇప్పటివరకు మొత్తం 107 మంది మృతి చెందారు.