రష్యా, పాక్​లో కరోనా తీవ్రం- ఒక్కరోజే 13 వేల కేసులు

ప్రపంచవ్యాప్తంగా 41 లక్షల 18 వేలమందికి పైగా కరోనా సోకింది. ఇప్పటివరకు 2లక్షల 80వేలమందికి పైగా వైరస్​కు బలయ్యారు. రష్యాలో ఒక్క రోజు వ్యవధిలో 11వేలమందికి వైరస్ సోకింది. అక్కడ ఇప్పటివరకు 1900మంది వైరస్​కు బలయ్యారు. పాకిస్థాన్​లోనూ కరోనా​ వేగంగా విస్తరిస్తోంది.

ప్రపంచవ్యాప్తంగా కరోనా కేసులు పెరుగుతున్నాయి. 24 గంటల వ్యవధిలో 20,000 మందికి పైగా వైరస్ బారినపడ్డారు. మొత్తంగా 2,80,000 మందికిపైగా ప్రాణాలు కోల్పోయారు.

రష్యాలో వైరస్ ఉద్ధృతి ఎక్కువగా ఉంది. అక్కడ ఇప్పటివరకు 2,09,600 మందికిపైగా వైరస్ సోకింది. ఆదివారం ఒక్కరోజే 11,012 మందిలో వైరస్ నిర్ధరణ అయింది. 1900 మంది కరోనాకు బలయ్యారు.

రష్యాలోని కేసుల్లో సగానికి పైగా మాస్కోలోనే నమోదయ్యాయి.

లాక్​డౌన్ అమలుకే బ్రిటన్ మొగ్గు..

వైరస్​పై పోరులో మిగతా దేశాలు పలు ఆంక్షలు సడలిస్తున్నా.. సంపూర్ణ లాక్​డౌన్​ వైపే మొగ్గు చూపింది బ్రిటన్. మరో మూడు వారాల పాటు ఆంక్షలు అమలులో ఉంటాయని చెప్పింది. సోమవారం నుంచి ఈ నిబంధనలు అమలులోకి రానున్నాయి. ఇప్పటికే 31,660మందికి పైగా అక్కడ ప్రాణాలు కోల్పోయారు. 2,15,000 మంది వైరస్ బారినపడ్డారు.

ఇటలీలో 4వేల మందికి వైరస్ నయం..

వైరస్​తో తీవ్రంగా ప్రభావితమైన దేశాల్లో ఒకటైన ఇటలీలో కొత్తగా 4వేలమందికి పైగా వైరస్​ నుంచి విముక్తి పొందారు. తాజాగా 1000 మందికిపైగా వైరస్ బారినపడ్డారు. మరో 194మంది ప్రాణాలు కోల్పోయారు. అక్కడ మొత్తంగా మృతుల సంఖ్య 30,395గా ఉండగా... 2,18,260కు పైగా బాధితులు ఉన్నారు.

టర్కీలో 50 మంది మృతి

టర్కీలో కొత్తగా 50 మంది ప్రాణాలు కోల్పోయారు. 1,546 మందికి వైరస్ సోకింది. మొత్తం మరణాల సంఖ్య 3,739 గా ఉండగా.. 1,37,000 మందికి పైగా కరోనా బాధితులు ఉన్నారు. 89,480 మంది కోలుకున్నారు.

సోమవారం నుంచి పలు ఆంక్షల సడలించనుంది టర్కీ. షాపింగ్​ మాళ్లు, సెలూన్లు తెరుచుకోనున్నాయి.

పాక్​లో కొత్తగా 1990మందికి వైరస్..

పాకిస్థాన్​లో మరో 1990 మందికి పైగా కరోనా నిర్ధరణ అయింది. దీంతో అక్కడ వైరస్ బాధితుల సంఖ్య 29,000 వేలను దాటింది. 24 గంటల వ్యవధిలో 21మంది వైరస్​తో మృతి చెందారు. మొత్తం మరణాల సంఖ్య 639కి చేరింది.

శనివారం నుంచి లాక్​డౌన్ ఆంక్షలను సడలించిన నేపథ్యంలో వైరస్ విజృంభించే అవకాశాలు ఎక్కువగా ఉన్నాయని నిపుణులు అభిప్రాయపడుతున్నారు.

మలేసియాలో ఆంక్షలు..

మలేసియాలో లాక్​డౌన్​ను నాలుగు వారాల పాటు కొనసాగిస్తున్నట్లు ప్రకటించింది అక్కడి ప్రభుత్వం. జూన్ 9 వరకు ఆంక్షలు అమలులో ఉంటాయని చెప్పింది. అయితే పలు వ్యాపారాలు, పరిశ్రమల కార్యకలాపాలకు అనుమతించింది. సర్కారు ఇచ్చిన సడలింపులతో 60 లక్షలమంది తిరిగి విధుల్లో చేరారు.

మలేసియాలో మొత్తం 6,589మందికి వైరస్ సోకింది. 180 మంది మృతి చెందారు.

చైనాలో మరో 14మందికి కరోనా..

చైనాలో కొత్తగా 14మందికి వైరస్ సోకింది. దీంతో అక్కడ వైరస్ బాధితుల సంఖ్య 82,901కి చేరింది. 4,630మందికి పైగా మృతి చెందారు. జిలిన్ రాష్ట్రంలో 11 మంది, హుబేలో ఒకరికి వైరస్ సోకిందని అక్కడి అధికారులు వెల్లడించారు. లక్షణాలు లేని దొంగ వైరస్ మరో 20మందికి సోకినట్లు తెలిపారు.

సింగపూర్​లో 23వేలు దాటిన కేసులు..

సింగపూర్​లో కొత్తగా 836 మందికి కరోనా సోకింది. మొత్తం బాధితుల సంఖ్య 23,336కు చేరింది. ఇప్పటివరకు 20మంది మరణించారు.

ఆఫ్రికాలో 60వేలకు పైగా..

ఆఫ్రికా ఖండంలో 60,000కు పైగా కరోనా కేసులు నమోదయ్యాయి. దక్షిణాఫ్రికాలో 9,400 మందికి వైరస్ నిర్ధరణ అయింది.

ఇదీ చూడండి:5 మిత్ర దేశాలకు భారత్​ వైద్య సహాయం