నెగ్గిన బోరిస్​ ప్రతిపాదన.. డిసెంబర్​ 12నే ఎన్నికలు

బ్రిటన్ ప్రధాని బోరిస్ జాన్సన్​.. ముందస్తు ఎన్నికల ప్రతిపాదనకు అనూహ్య మద్దతు లభించింది. హౌస్​ ఆఫ్​ కామన్స్ 438 ఓట్లతో.. 20 ఓట్ల మెజారిటీతో డిసెంబర్ 12న ముందస్తు ఎన్నికలు నిర్వహించడానికి ఆమోదం తెలిపింది. 1923 తరువాత డిసెంబర్​లో ఎన్నికలు జరగడం ఇదే మొదటిసారి కావడం గమనార్హం.

డిసెంబర్​ 12న ముందస్తు ఎన్నికలకు వెళ్లాలని బ్రిటన్​ ప్రధాని బోరిస్ జాన్సన్ చేసిన ప్రతిపాదనను హౌస్ ఆఫ్​ కామన్స్ అంగీకరించింది.​ ఇప్పటి వరకు ముందస్తు ఎన్నికలను వ్యతిరేకిస్తూ వస్తున్న ఎంపీలు.. అనూహ్యంగా 438 ఓట్లు వేసి 20 ఓట్ల మెజారిటీతో బోరిస్ ప్రతిపాదనను సమర్థించారు.

హౌస్​ ఆఫ్ లార్డ్స్​ కూడా ఈ చట్టాన్ని ఆమోదిస్తే.. 1923 తరువాత మరలా డిసెంబర్​లో ఎన్నికలు నిర్వహించడం ఇదే మొదటిసారి అవుతుంది. అదే జరిగితే ఈ వారాంతానికి చట్టంగా మారనుంది. అపుడు పోలింగ్ రోజు వరకు 5 వారాల పాటు ఎన్నికల ప్రచారం చేసుకునే అవకాశం రాజకీయ పక్షాలకు ఉంటుంది.

బ్రెగ్జిట్ గడువు 2020 జనవరి 31 వరకు పొడిగించిన నేపథ్యంలో.. క్రిస్​మస్​ కంటే ముందే సార్వత్రిక ఎన్నికలు నిర్వహించాలని ప్రధాని బోరిస్ పట్టుబట్టారు. తాజాగా దీనికి ఎంపీలు కూడా సరే అనడం వల్ల.. బ్రెగ్జిట్ విషయంలో ప్రజాభిప్రాయం పొందటానికి బోరిస్​కు మంచి అవకాశం వచ్చింది.

"బ్రెగ్జిట్, దేశ భవిష్యత్తు కోసం ప్రజలు తప్పకుండా ఎన్నికల్లో పాల్గొని తమ అభిప్రాయం చెప్పాలి."
- బోరిస్ జాన్సన్​, బ్రిటన్ ప్రధాని

మరికాస్త ముందుకెళ్దాం..

ముందస్తు ఎన్నికల తీర్మానంలో స్వల్పమార్పు చేపట్టాలని లేబర్​ పార్టీ కోరింది. డిసెంబర్​ 9న ముందస్తు ఎన్నికలు నిర్వహించాలని ప్రతిపాదించింది. ఈ నిర్ణయాన్ని మరికొన్ని విపక్షపార్టీలు సమర్థించాయి. సరైన కాలవ్యవధి ఉన్నందున విశ్వవిద్యాలయ విద్యార్థులు కూడా పోలింగ్​లో పాల్గొనే అవకాశం ఉంటుందని పేర్కొన్నాయి.

లేబర్​ పార్టీ నాయకుడు జెరెమీ కార్బిన్ తమ పార్టీ.. 'మన దేశం ఇప్పటి వరకు చూడని నిజమైన మార్పు కోసం అత్యంత ప్రతిష్టాత్మకంగా, ఉద్ధృతంగా ప్రచారాన్ని ప్రారంభిస్తుంది' అని అన్నారు.

ఇదీ చూడండి:సౌదీలో విజయవంతంగా ముగిసిన మోదీ పర్యటన