బ్రిటన్​ నూతన స్పీకర్​గా లిండ్సే హోయల్​!

బ్రిటన్​ పార్లమెంట్​ నూతన స్పీకర్​గా లిండ్సే హోయల్​ ఎన్నికయ్యారు. జాన్​ బెర్కో రాజీనామాతో నిర్వహించిన ఎన్నికల్లో 540 మందిలో 325 మంది ఎంపీలు లిండ్సేకు మద్దతుగా ఓట్లు వేశారు. 158వ స్పీకర్​గా బాధ్యతలు చేపట్టనున్నారు లిండ్సే. నూతన స్పీకర్​కు శుభాకాంక్షలు తెలిపారు ప్రధాని బోరిస్​ జాన్సన్​.

బ్రిటన్​ హౌస్​ ఆఫ్​ కామన్స్​కు 158వ స్పీకర్​గా ప్రముఖ లేబర్​ పార్టీ శాసనసభ్యుడు లిండ్సే హోయల్​ ఎన్నికయ్యారు. తాజాగా జరిగిన ఎన్నికలో లిండ్సేకే మద్దతు పలికారు ఎంపీలు. జాన్ బెర్కో స్థానాన్ని లిండ్సే భర్తీ చేయనున్నారు.

లిండ్సే హోయల్​.. గత 22 ఏళ్లుగా ఎంపీగా బాధ్యతలు నిర్వర్తిస్తున్నారు. 2010 నుంచి మాజీ స్పీకర్​ జాన్​ బెర్కోకు సహాయకుడిగా సేవలందిస్తున్నారు. నూతన స్పీకర్​ ఎన్నికలో పోటీపడిన ఆరుగురు అభ్యర్థులను వెనక్కి నెట్టి 540 మంది సభ్యులు కలిగిన హౌస్​​ ఆఫ్​ కామన్స్​లో 325 ఓట్లు సాధించారు లిండ్సే.

రాజకీయంగా శక్తిమంతమైన మహిళా ఎంపీ హర్రియత్​ హర్మాన్​ మొదటి మూడు రౌండ్లలో లిండ్సేకు గట్టి పోటీ ఇచ్చారు.చివరి రౌండ్​లో కొంత ఉత్కంఠ నెలకొన్నప్పటికీ.. సుమారు 60 శాతం మంది శాసనసభ్యుల ఓట్లను సంపాదించారు.

స్పీకర్​గా తనకు మద్దతు పలికిన ఎంపీలను ఉద్దేశించి కీలక వ్యాఖ్యలు చేశారు లిండ్సే. ఎదురయ్యే నూతన సవాళ్లను సమర్థవంతంగా ఎదుర్కొంటానని పేర్కొన్నారు.

ప్రధాని శుభాకాంక్షలు..

నూతన స్పీకర్​గా ఎన్నికైన లిండ్సేకు శుభాకాంక్షలు తెలిపారు ప్రధాని బోరిస్​ జాన్సన్​. లిండ్సే మంచి లక్షణాలు కలిగిన వ్యక్తి అని కొనియాడారు. తాము చేపట్టబోయే బ్రెగ్జిట్​పై సరైన నిర్ణయం తీసుకుంటారని ఆశాభావం వ్యక్తం చేశారు. డిసెంబర్​ 12న ఎన్నికలకు వెళుతున్న నేపథ్యంలో పార్లమెంట్​ రద్దు అవుతున్న విషయాన్ని గుర్తు చేశారు. ఎన్నికల అనంతరం పూర్తి స్థాయిలో స్పీకర్​గా లిండ్సే విధులు నిర్వర్తిస్తారని తెలిపారు.

ఇదీ చూడండి: బ్రెగ్జిట్ గడువు పెంపునకు ఈయూ అంగీకారం