రిపోర్టర్​ ఫోన్​ లాక్కొని జేబులో వేసుకున్న ప్రధాని

ఇంటర్వ్యూ చేస్తున్న ఓ రిపోర్టర్​పై కసురుకుంటూ ఫోన్​ లాక్కొని జేబులో వేసుకున్నారు ఓ దేశ ప్రధాని. ఆ వీడియో ఇప్పుడు నెట్టింట వైరల్​గా మారింది. ఇంతకీ ఎవరా ప్రధాని?

బ్రిటన్​ సార్వత్రిక ఎన్నికలకు 2 రోజుల ముందు ప్రధాన మంత్రి బోరిస్​ జాన్సన్​ మరో వివాదంలో చిక్కుకున్నారు. ఇంటర్వ్యూ చేస్తున్న ఓ టీవీ ఛానల్​ రిపోర్టర్​ ఫోన్​ లాక్కొని కసురుకుంటూ జేబులో వేసుకున్నారు. ప్రస్తుతం ఈ వీడియో నెట్టింట్లో వైరల్​గా మారగా... బోరిస్​పై సర్వత్రా విమర్శలు వెల్లువెత్తుతున్నాయి.

ఇదీ జరిగింది

డిసెంబర్​ 12న సాధారణ ఎన్నికలు జరగనున్న తరుణంలో ప్రభుత్వ వైద్య వ్యవస్థ పనితీరుపై బోరిస్​ను ఇంటర్వ్యూ చేశారు ఐటీవీ రిపోర్టర్ జో పైక్​. ఓ ఆస్పత్రిలో నాలుగేళ్ల బాలుడు నేలపై పరిచిన వస్త్రాలపైనే పడుకుని చికిత్స తీసుకుంటున్న ఫొటోను ప్రధానికి చూపించారు. అసహనానికి గురైన జాన్సన్​... టక్కున ఆ ఫోన్​ లాక్కుని, జేబులో పెట్టుకున్నారు.

ఇలా చేయడంపై పైక్​ అభ్యంతరం తెలిపారు. కాసేపటికి ఫోన్​ తీసి, బాలుడు ఫొటో చూసిన ప్రధాని... బాధిత కుటుంబాలకు సానుభూతి తెలిపారు. ఫోన్​ను రిపోర్టర్​కు తిరిగిచ్చారు.
ఇందుకు సంబంధించిన దృశ్యాల్ని ఆ రిపోర్టర్​ సామాజిక మాధ్యమాల్లో పోస్ట్​ చేశారు. కాసేపట్లోనే ఆ వీడియో నెట్టింట వైరల్ అయింది. రెండు గంటల్లోనే దాదాపు పది లక్షల మందికిపైగా వీక్షించారు. ప్రధాని తీరును తప్పుబడుతూ విమర్శలు గుప్పించారు.

ప్రత్యర్థులకు అస్త్రం...

బోరిస్​పై ప్రత్యర్థి లేబర్​ పార్టీ జెరెమీ కార్బిన్​​ విమర్శలు కురిపించారు. ప్రజారోగ్యాన్ని ఆయన ప్రభుత్వం ఏమాత్రం పట్టించుకోవడం లేదని ఆరోపించారు.

ఇదీ చూడండి : ఎన్నికల వేళ ప్రధాని ప్రియురాలు చీరలో మెరిసెనిలా...