బ్రిటన్​ ప్రధానిగా బోరిస్​ బాధ్యతల స్వీకరణ

బ్రిటన్​ నూతన ప్రధానిగా ఆ దేశ మాజీ విదేశాంగ మంత్రి బోరిస్​ జాన్సన్​ అధికారికంగా బాధ్యతలు స్వీకరించారు. ప్రధాని థెరిసా మే రాజీనామా అనంతరం కొత్త ప్రభుత్వాన్ని ఏర్పాటు చేయాలన్న బ్రిటన్​ రాణి ఎలిజబెత్​-2 సూచన మేరకు ప్రమాణ స్వీకారం చేశారు బోరిస్.

బ్రిటన్​లో నూతన ప్రభుత్వం ఏర్పాటయింది. ప్రధానిగా బోరిస్​ జాన్సన్​ బాధ్యతలు స్వీకరించారు. ప్రధాని పదవికి​ థెరిసా మే రాజీనామా చేసిన తర్వాత కొత్త ప్రభుత్వాన్ని ఏర్పాటు చేయాలని బోరిస్​కు బ్రిటన్​ రాణి ఎలిజబెత్​-2 సూచించారు. ఈ మేరకు బకింగ్​హామ్​ ప్యాలెస్​ పాలకవర్గం ప్రకటన చేసింది.

ప్రమాణ స్వీకారంలో భాగంగా ప్రజల సేవకు నిబద్ధుడినై ఉంటానని స్పష్టం చేశారు బోరిస్​. సరికొత్త ఒప్పందంతో అక్టోబర్​ 31న ఐరోపా సమాఖ్య నుంచి వైదొలుగుతామని ప్రకటించారు. బ్రిటిష్​ మంత్రివర్గాన్ని కూడా పునర్​ వ్యవస్థీకరించారు బోరిస్​ జాన్సన్​.

థెరిసా రాజీనామా..

బ్రిటన్ ప్రధాన మంత్రి థెరిసా మే బుధవారం తన పదవికి రాజీనామా చేశారు. ఆమె రాజీనామాను బకింగ్‌హామ్​ ప్యాలెస్‌లో క్వీన్ ఎలిజబెత్-2కు సమర్పించారు. బోరిస్ జాన్సన్‌ కన్జర్వేటివ్ పార్టీ నేతగా ఎన్నికైన తరువాత థెరిసా మే రాజీనామా చేశారు.

2016 జూలై 13న ప్రధాన మంత్రిగా ప్రమాణ స్వీకారం చేశారు థెరిసా. రాజీనామా సమర్పించడానికి ముందు ఆమె వీడ్కోలు ప్రసంగం చేశారు. తదుపరి ప్రధాన మంత్రి బోరిస్ జాన్సన్‌కు శుభాకాంక్షలు తెలిపారు.

నూతన మంత్రివర్గంలో భారతీయురాలు

బ్రిటిష్ మంత్రివర్గాన్ని పునర్ వ్యవస్థీకరించిన బోరిస్​ జాన్సన్ భారత సంతతికి చెందిన ప్రీతి పటేల్‌ను హోంమంత్రిగా నియమించారు. బ్రిటన్‌ను భద్రంగా, సురక్షితంగా ఉంచేందుకు కృషి చేస్తానని ప్రకటించారు గుజరాత్‌కు చెందిన ప్రీతి పటేల్.

ఇదీ చూడండి: బ్రిటన్​ ప్రధానిగా జాన్సన్​- బ్రెగ్జిట్టే అజెండా