వికీలీక్స్ వ్యవస్థాపకుడు జులియన్ అసాంజేకు మరో ఎదురుదెబ్బ తగిలింది. 2012లో బెయిల్ నిబంధనలను ఉల్లంఘించినందుకు బ్రిటన్లోని సౌత్వార్క్ క్రౌన్ కోర్టు 50 వారాల జైలు శిక్షను విధించింది.
వెస్ట్మినిస్టర్ మేజిస్ట్రేట్ కోర్టు మంజూరు చేసిన బెయిల్ నిబంధనలను ఉల్లంఘించి కోర్టుకు హాజరు కాలేదు అసాంజే. 2012 నుంచి లండన్లోని ఈక్వెడార్ దౌత్య కార్యాలయంలో ఆశ్రయం పొందుతున్నారు.
ఇటీవల ఇక్వెడార్ ఆశ్రయాన్ని రద్దు చేయటం వల్ల బ్రిటన్ పోలీసులు ఆయనను అరెస్టు చేశారు. దీనితో గత నెలలో లండన్లోని వెస్ట్మినిస్టర్ కోర్టు అసాంజేను దోషిగా నిర్ధారిస్తూ తీర్పు నిచ్చింది.
దౌత్య కార్యాలయంలో ఉండటం వల్ల బ్రిటన్లోనే ఉన్నప్పటికీ అసాంజేను చేరుకోలేకపోయామని సౌత్వార్క్ కోర్టు వ్యాఖ్యానించింది. అమెరికా నుంచి పొంచి ఉన్న ప్రమాదం వల్లే ఇలా చేశారని అసాంజే తరఫు న్యాయవాది కోర్టుకు విన్నవించారు. ఎన్నో కష్టాలను ఎదుర్కున్నానని కోర్టుకు అసాంజే తెలిపినప్పటికీ న్యాయమూర్తి తిరస్కరించారు.
