మానవ హక్కుల ఉల్లంఘనే: అసాంజే అరెస్ట్​పై ఐరాస

వికీలీక్స్ వ్యవస్థాపకుడు జులియన్ అసాంజేను ప్రమాదంలో పడేశారని ఐరాస వ్యాఖ్యానించింది. ఆయన అరెస్టును మానవ హక్కుల ఉల్లంఘనగా పేర్కొంది. బ్రిటన్​, ఈక్వెడార్​ల నేతలు అసాంజే అరెస్టుపై స్పందించారు.

వికీలీక్స్ వ్యవస్థాపకుడు జులియన్ అసాంజే అరెస్టును మానవ హక్కుల ఉల్లంఘనగా అభివర్ణించింది ఐక్య రాజ్య సమితి. అసాంజే అరెస్ట్​పై ఈక్వెడార్, బ్రిటన్​లను విమర్శించింది. అసాంజేను అమెరికాకు అప్పగిస్తే ఆయన అత్యంత ప్రమాదకర పరిస్థితులను ఎదుర్కొనే అవకాశం ఉందని అభిప్రాయపడింది.

ఐరాస ప్రత్యేక అధికారి ఆగ్నేస్ కలామార్డ్ ఈ ప్రకటనను విడుదల చేశారు.

"అసాంజేను తీవ్రమైన ప్రమాదంలో పడేశారు. మానవ హక్కుల్ని హరించారు. ఈక్వెడార్ దౌత్య కార్యాలయంలో ఆయనను కలవడానికి బదులు... ఇప్పుడు పోలీసు స్టేషన్​లో కలవాల్సిన పరిస్థితి ఏర్పడింది." -ఐరాస ప్రకటన

చట్టానికి ఎవరూ అతీతులు కాదు

అసాంజే అరెస్టును ప్రశంసించారు బ్రిటన్​ ప్రధాని థెరిసా మే.

"బ్రిటన్​లో ఎవరూ చట్టానికి అతీతులు కాదు, బ్రిటన్ పోలీసులు వారి కర్తవ్యాన్ని గొప్పగా నిర్వర్తించారు"

- థెరిసా మే, బ్రిటన్ ప్రధాని

అసాంజే హీరో కాదు

"చట్టాన్ని తప్పించుకోవాలనుకోవడం అంగీకరించాల్సిన విషయం కాదు. చాలాకాలంగా అసాంజే అదే పనిచేస్తున్నారు. అందుకే ఆయన హీరో కాదు. ఏళ్లుగా ఆయన సత్యం నుంచి తప్పించుకోవాలని చూస్తున్నారు. బ్రిటన్​ న్యాయవ్యవస్థే అసాంజే భవితవ్యంపై నిర్ణయం తీసుకుంటుంది"

-జెరేమీ హంట్, బ్రిటన్ విదేశాంగ మంత్రి

హామీ తీసుకున్నాకే రక్షణ ఉపసంహరణ

అసాంజే అరెస్టుపై ఈక్వెడార్​ ప్రభుత్వం స్పందించింది .

" మరణ శిక్ష అమలులో ఉన్న ఏ దేశానికి తరలించబోమబోమని బ్రిటన్​ నుంచి హామీ పొందాకే అసాంజేకు రక్షణను ఉపసంహరించాం. ఈ విషయాన్ని బ్రిటన్​ ప్రభుత్వం రాతపూర్వకంగా అంగీకరించింది" -లెనినో మోరెనో, ఈక్వెడార్ అధ్యక్షుడు

ఇదీ చూడండీ: అసాంజే: పారదర్శకతకు ప్రతీకా? రాజద్రోహా?