90 ఏళ్ల వయసంటే.. సరిగా నడవడానికే చాలా కష్టం. అలాంటిది.. స్వచ్ఛంద సేవా సంస్థలకు నిధులు సమకూర్చేందుకు ఏకంగా స్కాటిస్ పర్యతాన్నే అధిరోహించేందుకు సిద్ధమైంది బ్రిటన్లోని స్కాటిస్ హైల్యాండ్స్కు చెందిన మార్గరెట్ పైనీ అనే బామ్మ. అయితే అది ప్రత్యక్షంగా కాదు.. తన ఇంట్లోని మెట్లెక్కుతూ ఈ ఫీట్ అందుకోవాలని ప్రయత్నిస్తోంది.
ప్రిన్స్ ప్రశంసలు..
తొమ్మిది పదుల వయసులోనూ సామాజిక దృక్పథంతో ఆలోచించి తనంతట తానుగానే ఈ ఛాలెంజ్ చేసుకుంది మార్గరెట్. అంతేకాదు రెండు నెలల్లోనే 3.9 లక్షల పౌండ్ల(4,89,235 యూఎస్ డాలర్లు) నిధులు సైతం సేకరించి బ్రిటన్ ప్రిన్స్ నుంచి ప్రశంసా ఉత్తరాన్ని అందుకుంది. ఈ నిధులను ఎన్హెచ్ఎస్, హైల్యాండ్స్ హోస్పైస్ అండ్ ది రాయల్ నేషనల్ లైఫ్బోట్ ఇన్స్టిట్యూషన్కు అందించనుంది.
ఎన్హెచ్ఎస్ కోసం ఇదివరకే ఎన్నో మిలియన్ పౌండ్ల నిధులు సేకరించిన సర్ కాప్టెన్ టామ్.. ఆదర్శంతో ఈస్టర్ రోజున ఈ ప్రయత్నం మొదలు పెట్టినట్లు వెల్లడించింది మార్గరెట్. 10 నుంచి 12 వారాల్లో ఈ ఛాలెంజ్ను పూర్తి చేస్తానని చెప్పుకొచ్చిందీ బామ్మ.
ఇదీ చదవండి:'యోగా ఫ్రమ్ హోం'కు అమెరికన్లు సన్నద్ధం
