బాలికలు, యువతులే ప్రధాన లక్ష్యంగా ఆన్లైన్ వేధింపులు, బెదిరింపులకు పాల్పడుతున్నారని బ్రిటన్కు చెందిన 'ప్లాన్ ఇంటర్నేషనల్' సర్వే వెల్లడించింది. ప్రపంచ బాలికల దినోత్సవానికి ముందు ఈ సర్వే ఫలితాలను విడుదల చేసింది సంస్థ.
భారత్, అమెరికా తదితర 22 దేశాల్లో నిర్వహించిన ఈ సర్వేలో 15-25 మధ్య వయసున్న 14 వేల మంది పాల్గొన్నారు. 'స్టేట్ ఆఫ్ ద వరల్డ్ గర్ల్స్ రిపోర్ట్' పేరుతో విడుదలైన ఈ నివేదిక ద్వారా లైంగిక బెదిరింపులు, జాత్యహంకార వ్యాఖ్యలు.. ఇలా వేర్వేరు మార్గాల్లో యువతులపై దాడులు జరుగుతున్నట్లు స్పష్టమైంది.
సామాజిక మాధ్యమాల్లో..
సర్వేలో పాల్గొన్నవారిలో 58 శాతం మంది ఫేస్బుక్, ఇన్స్టాగ్రామ్, ట్విట్టర్, వాట్సాప్, టిక్టాక్ వంటి మాధ్యమాల్లో వేధింపులకు గురైనట్లు అంగీకరించారు. అన్ని దేశాల్లోనూ వీరి శాతం దాదాపు సమానంగా ఉంది.
ఇది ఐరోపాలో 63 శాతం, లాటిన్ అమెరికాలో 60 శాతం, ఆసియా-పసిఫిక్లో 58 శాతం, ఆఫ్రికాలో 54 శాతం, ఉత్తర అమెరికాలో 52 శాతంగా ఉంది.
నివేదికలోని అంశాలు..
- భౌతిక లేదా లైంగిక హింసకు సంబంధించిన బెదిరింపులు 47 శాతం మందికి వచ్చాయి.
- అసభ్య పదజాలం, దూషణలను ఎదుర్కొన్నవారు 59 శాతం మంది ఉన్నారు.
- మైనారిటీ, ఎల్‌జీబీటీక్యూ వర్గాలకు చెందిన యువతులు చాలా మంది.. తమ గుర్తింపు కారణంగా వేధింపులు ఎదుర్కొన్నట్లు చెప్పారు. ఎల్జీబీటీక్యూలో 42 శాతం, మైనారిటీల్లో 37 శాతం మంది బాధితులు ఉన్నారు.
- ప్రస్తుత, మాజీ భాగస్వాములతో 11 శాతం, స్నేహితులతో 23 శాతం వేధింపులు ఎదుర్కొన్నారు.
ఇదీ చూడండి:అమ్మాయి.. గుర్రంలా గంతులేస్తోంది!
